Մեքսիկայում օդանավի ուղևորին ձերբակալել են վթարային դուռը բացելու և թևի վրա ոտք դնելու համար, հայտնում է BBC-ն։

Տղամարդը նման գործողությունների է դիմել այն բանից հետո, երբ Գվատեմալա-սիթի մեկնող ինքնաթիռը մի քանի ժամով մնացել է թռիչքուղու վրա՝ առանց օդորակիչի և ուղևորների համար ջրի:

Մեխիկոյի միջազգային օդանավակայանը հայտնել է, որ ոչ ոք չի տուժել, սակայն ուղևորին հանձնել են ոստիկանությանը:

Միջադեպը տեղի է ունեցել անցյալ հինգշաբթի առավոտյան ժամը 11:30-ի սահմաններում՝ մոտավորապես երեք ժամ անց այն բանից հետո, երբ Aeromexico-ի չվերթը պետք է թռչեր Մեխիկոյից:

Հետաձգման պատճառ է դարձել տեխնիկական սպասարկման խնդիրը, ասվում է միջադեպի մասին զեկուցագրում

Հայտարարության մեջ այնուհետև բացատրվում է, որ այլ օդանավ տեղափոխվելը անհրաժեշտ է դարձել անհայտ ուղևորի հանձնումից հետո:

Հայտնի չէ, արդյո՞ք, տղամարդը շարունակում է մնալ կալանքի տակ և ինչ մեղադրանքներ կարող են առաջադրվել նրան։

Զայրացած ուղևորները, սակայն, միջադեպը տեսան այլ լույսի ներքո:

«CDMX-ից (Մեքսիկա) դեպի Գվատեմալա AM 0672 չվերթի բոլոր ուղևորները նշում են, որ ինքնաթիռում գտնվող ուղևորը, որը բացել է վթարային դուռը, դա արել է բոլորի պաշտպանության համար, բոլորի աջակցությամբ, քանի որ հապաղումը և օդի պակասը վտանգավոր պայմաններ են ստեղծել ուղևորների առողջության համար»,-ասվում է ուղևորների հայտարարության մեջ, որոնք պնդում են, որ տղամարդը փրկել է իրենց կյանքը։

Աղբյուրը՝ news.am