Ահաբեկիչների համար, որոնք հրաձգություն էին կազմակերպել մերձմոսկովյան «Կրոկուս սիթի հոլ» համերգասրահում, պատրաստել էին «պատուհան» Ուկրաինա փախչելու համար, ռուսաստանցիներին հղած իր ուղերձում ասել է երկրի նախագահ Վլադիմիր Պուտինը։

Նա տեղեկացրել է ահաբեկչությունը կատարող չորս անձանց բռնվելու մասին, որոնք փորձում էին մեքենայով փախչել Ուկրաինայի ուղղությամբ։

ՌԴ նախագահի խոսքով՝ քննչական և իրավապահ մարմինները կանեն ամեն ինչ, որպեսզի պարզեն «Կրոկուս սիթի հոլի» ահաբեկչության բոլոր մանրամասները։

«Ահաբեկիչներին, մարդասպաններին, ահավոր մարդկանց, որոնք չունեն և չեն էլ կարող ունենալ ազգություն, աննախանձելի ճակատագիր է սպասվում՝ հատուցում և մոռացում։ Նրանք ապագա չունեն»,-ասել է Պուտինը։

«Ակնհայտ է, որ մենք բախվել ենք խաղաղ մարդկանց կազմակերպված զանգվածային սպանության»,-նշել է ՌԴ նախագահը։

Նրա խոսքով՝ հանցագործները սառնասրտորեն գնացել են սպանելու, դիմահար գնդակահարելու ռուսաստանցիներին, ինչպես մի ժամանակ գործում էին նացիստները։

Ռուսաստանի նախագահը նշել է, որ Մոսկվայում և Ռուսաստանի մյուս տարածաշրջաններում մտցվել են լրացուցիչ հակաահաբեկչական և հակադիվերսիոն միջոցներ։

«Մոսկվայում և Մերձմոսկվայում, երկրի բոլոր տարածաշրջաններում մտցվել են հակաահաբեկչական և հակադիվերսիոն բնույթի լրացուցիչ միջոցներ։ Գլխավորն այժմ այն է, որ թույլ չտրվի նրանց, ովքեր կանգնած են այս արյունալի սպանդի հետևում, նոր հանցագործություն կատարել»,-ասել է նա։

«Մենք կպարզենք և կպատժենք յուրաքանչյուրին, ով պատրաստել է Ռուսաստանին ուղղված այս հարվածը... Բոլոր հանցակիցները պատիժ կկրեն։ Ով էլ որ լինեն։ Ով էլ որ նրանց ուղարկած լինի։ Մենք կպարզենք ու կպատժենք յուրաքանչյուրին, ով պատրաստել է Ռուսաստանին ուղղված այս հարվածը»,-ասել է Ռուսաստանի նախագահը։

Նա հայտնել է նաև, որ իշխանությունները պատրաստ են միավորել ջանքերը այլ երկրների հետ միջազգային ահաբեկչության դեմ պայքարում։ «Մեր պարտքն է՝ լինել միասին մեկ շարքում։ Ոչ ոք և ոչինչ չի կարող սասանել մեր համախմբվածությունն ու կամքը»,-նշել է ՌԴ նախագահը։

Աղբյուրը՝ news.am