Ռուս երգչուհի Ժասմինն ամուսնացրել է իր 26-ամյա որդուն՝ Միխայիլ Սեմենդուևին, որի ընտրյալը գեղասահորդուհի Եվա Խաչատուրյանն է։ Միջոցառմանը հրավիրված երեք հարյուր հյուրերի թվում նկատել են Ֆիլիպ Կիրկորովին, Վալերիային, նրա ամուսնուն՝ Իոսիֆ Պրիգոժինին, և այլ սիրված արտիստների, հայտնում է Муз-ТВ-ն։

Ժասմինի խոսքով՝ հարսանիքը տեղի է ունեցել լեռնային հրեաների ավանդույթներին համապատասխան։ Հարսի և փեսայի ծնողները պայմանավորվել են, թե ով ինչ կտա և որքան գումար կներդնի տոնակատարության մեջ։

Երգչուհին հերքել է Եվայի հղիության մասին լուրերը. «Ես, պարզապես, բարի սկեսուր եմ»,-ասել է Ժասմինը:

Վալերիային շատ է դուր եկել հարսանեկան արարողությունը։ «Մեր երեխաները հասակակիցներ են։ Իսկ հիմա իրենք իրենց ընտանիքներն են ստեղծում, սա է կյանքի ընթացքը։ Եվ դա հիանալի է»,-նշել է նա:

Ֆիլիպ Կիրկորովը, նույնպես, չի հիասթափեցրել և, նույնիսկ, իր հիթերից մեկը կատարել է նորապսակների համար։ «Ժասմինը գեղեցիկ է և ունի հիանալի որդի: Նույնիսկ չեմ կարողանում հավատալ, որ ներկա եմ նրա հարսանիքին։ Նա գործնականում մեծացել է իմ աչքի առաջ։ Շատ լավ, ազնիվ, տաղանդավոր տղա է։ Այլ կերպ չէր էլ կարող լինել»,-իր կարծիքն է հայտնել ռուսական բեմի փոփ արքան։

Խաչատուրյանը ծնվել է Դոնի Ռոստովում։ Աղջիկը հաջողության է հասել գեղասահքի ոլորտում։ Այժմ նա Մոսկվայում աշխատում է որպես լրագրող և սովորում է Օստանկինոյի կինոյի և հեռուստատեսության դպրոցում։ Շատերը կարծում են, որ Եվան շատ նման է Ժասմինին։