Հունիսի 10-ին ռուսական «Օկկո» առցանց կինոթատրոնում տեղի կունենա Վիկտոր Սողոմոնյանի նոր սերիալի պրեմիերան՝ 12 սերիայից բաղկացած քաղաքական դետեկտիվ «Վարշավա 21»-ը, որը պատմում է Լեհաստանում ռուս դիվանագետների աշխատանքի մասին։

«Վարշավա 21» սերիալի բեմադրող ռեժիսորը Ֆելիքս Գերչիկովն է, բեմադրող օպերատորը՝ Անտոն Կոստրոմինը, բեմադրող նկարիչը՝ Վասիլի Գրոզնին: Սերիալի գլխավոր դերերում հանդես են եկել Դմիտրի Միլլերը, Դմիտրի Կուլիչկովը, Վալերիա Շկիրանդոն, Կոնստանտին Կրյուկովը, Սերգեյ Յուշկևիչը, Անդրեյ Իլյինը, Յուրի Բատուրինը, Նիկոլայ Կոզակը, Անատոլի Կոտենևը, Յուրի Բելյաևը, Սերգեյ Գուրևը և այլք:

Ֆիլմի գլխավոր պրոդյուսերները ռուս ամենահայտնի քաղաքական դետեկտիվներից մեկի՝ «Դեսպանատուն» (НТВ, 2018) սերիալի ստեղծողներն են՝ Վիկտոր Սողոմոնյանը և Միխայիլ Վոլոբուևը: Սա նրանց երրորդ համատեղ աշխատանքն է։

«Վարշավա 21» սերիալը նույնպես ստեղծվել է ռուսական կինեմատոգրաֆի համար հազվագյուտ քաղաքական դետեկտիվ ժանրում։ Չնայած այն հանգամանքին, որ սյուժեի հիմքում ընկած իրադարձությունները հորինված են, պատմությունն ինքնին բավականին ճշգրիտ փոխանցում է վերջին մի քանի տարիների ընթացքում աշխարհի քաղաքական քարտեզի վրա նկատվող տրամադրությունները:

Լեհաստանի նախագահի ընտրարշավի ժամանակ սպանվում է հայտնի լրագրող Կոզելսկին։ Լեհական հեռուստաալիքներն ակնթարթորեն վերցնում են երկրի ներքին գործերին Ռուսաստանի միջամտության վարկածը՝ սիլեզիական անջատողականներին աջակցելու և իրավիճակն ապակայունացնելու նպատակով։ Որպես ապացույց հեռուստատեսությամբ ներկայացվում է Ռուսաստանի դեսպան Կոնոբեևի (Անատոլի Կոտենև) և նախագահի թեկնածուներից Դոմբրովսկու (Սերգեյ Յուշկևիչ) խոսակցության ձայնագրությունը, որն, իբր, ուղարկվել է սպանված լրագրողի էլեկտրոնային փոստից:

Փոքր կայծից աշխարհաքաղաքական կրակ է բռնկվում, որը կարող է հսկայական վնաս հասցնել երկրի շահերին։ Դիվանագիտական առաքելության վարկաբեկված աշխատակիցը սրտի կաթվածով տեղափոխվում է հիվանդանոց, և նրա փոխարեն ժամանում է դիվանագետ Վյաչեսլավ Վասիլևը (Դմիտրի Միլլեր): Նա պետք է ապացուցի, որ Մոսկվայի հասցեին մեղադրանքները ոչ մի հիմք չունեն։

«Քաղաքական երանգով դետեկտիվ ժանրում աշխատելն աներևակայելի հետաքրքիր և միևնույն ժամանակ աներևակայելի բարդ գործ է։ Ստեղծագործությունը ստացվում է բազմակողմանի և հագեցած, և ամեն ինչ պայմանավորված է նրանով, որ պետք է հաշվի առնել բազմաթիվ գործոններ՝ պահպանելով հավասարակշռություն գեղարվեստական գրականության և իրականության միջև։ Այո, սերիալի իրադարձությունները կարող են հորինված լինել, բայց պատմության մթնոլորտը պետք է համոզի հեռուստադիտողին, որ այն, ինչ կատարվում է էկրանին, եթե ոչ վավերագրական պատմություն է, ապա անհավանական ակտուալ է և կյանքին մոտ:

Եվ եթե միևնույն ժամանակ հնարավոր է դիմանալ ինտենսիվ դետեկտիվ բաղադրիչին, ապա ծնվում է մի նախագիծ, որը գրավում և պահում է հեռուստադիտողին։ Ինձ թվում է, որ այս շարքում մենք կարողացանք հաղթահարել բազմաբնույթ առաջադրանքը և բոլոր բաղադրիչները մեկ պատկերի մեջ դնել: Բայց, իհարկե, վերջնական խոսքը հեռուստադիտողինն է»,-ասել է ֆիլմի ռեժիսոր Ֆելիքս Գերչիկովը: