«Հրապարակը» գրում է․ Երեւանի քաղաքապետ Տիգրան Ավինյանը 2024-ի նոյեմբերի 23-30-ը մեկնել էր ԱՄՆ՝ Լոս Անջելես, որի արդյունքում ինչ-որ փոխըմբռնման հուշագիր ստորագրվեց։ Երեւանի քաղաքապետարանից մեր հարցմանն ի պատասխան ասել էին, որ Ավինյանի 9 հոգանոց պատվիրակության այցը Լոս Անջելես երեւանցիների վրա «նստել» է 20 միլիոն 257 հազար դրամ, որը համարժեք է մոտ 50 հազար ԱՄՆ դոլարին։ Ըստ այդ պատասխանի, մոտ 5 միլիոնը գիշերակացին է հատկացվել, 3 միլիոնը՝ օրապահիկին, եւ 12 միլիոն 465 հազարը Երեւանի բյուջեից հատկացվել է 9 անձի գնալ-գալու համար։

Սակայն պարզվում է, որ սա ողջ իրականությունը չէ, Երեւանի քաղաքապետարանը թաքցրել է ծախսերի մի մասը՝ մոտ 10 միլիոն դրամով պակաս ներկայացնելով։ «Հրապարակի» ձեռքի տակ է հայտնվել մի փաստաթուղթ, որտեղ մանրամասն ներկայացված է, թե եւս 10 միլիոնն ինչի վրա է պետական բյուջեից ծախսվել։

Օրինակ, Ավինյանը ճաշկերույթ է կազմակերպել Լոս Անջելեսում՝ իր եւ այնտեղի բարձրաստիճան հյուրերի համար, որը քաղաքապետարանը ծախս չէր համարել եւ առաջին պատասխանում չէր ընդգրկել։ Տեխնիկական բնութագրում նշված է․ «Պաշտոնական ընդունելություն՝ պաշտոնական ճաշի եւ պաշտոնական ընթրիքի տեսքով, Լոս Անջելես քաղաքի բարձրակարգ ռեստորաններում՝ նոյեմբերի 23-30-ը, մինչեւ 20 անձի համար (նախուտեստներ, աղցաններ, մինչեւ 3 տաք կերակրատեսակ, աղանդեր, զովացուցիչ ըմպելիքներ, բնական հյութեր, ալկոհոլային ըմպելիքներ, սուրճ, թեյ, սրահի պատշաճ ներկայանալի տեսք, սանիտարահիգիենիկ պայմաններին համապատասխանող խոհանոց եւ սպասարկող անձնակազմով)։ Ընթրիքների եւ ճաշի ժամանակ առանձնացված սրահների ամրագրում»։

Պարզվում է, որ Ավինյանն ուղեւորության ընթացքում նաեւ թանկարժեք մեքենայով է շրջել` Chevrolet մակնիշի։ Գնման պայմաններում անգամ նշել են, որ մեքենան պետք է լինի մուգ գույնի, ապակիները լինեն թույլատրելի աստիճանի մգեցված, վարորդն էլ՝ համապատասխան փորձ ունեցող։ Ի դեպ, Chevrolet trax-ն Ավինյանի սիրելի մեքենաներից է։

Այդ հավելյալ 10 միլիոն դրամի մեջ են ներառվել նաեւ նվերներ՝ Ամերիկայի «բարեկամների» համար․ Արգիշտի Ա հուշաքանդակ՝ 1 հատ, «Երեւան» կոնյակ՝ 11 հատ, մետաքսե շարֆեր՝ 7 հատ, եւ լուսանկարչական ծառայություն։

Այս ծառայությունների մատուցումը Երեւանի քաղաքապետարանը պատվիրել է նույն՝ «Լաքշերի վոյաժ» ՍՊԸ-ին, որը նաեւ այս ուղեւորության թանկարժեք ավիատոմսերի մատակարարն էր եւ քաղաքապետարանի սիրելի գործընկերը։ Ամենայն հավանականությամբ, այս ընկերությունը փոխկապակցված է որեւէ իշխանական պաշտոնյայի հետ կամ էլ որոշակի կապեր ունի հենց Ավինյանի հետ։

Ի՞նչ է ստացվում․ որ Ավինյանի՝ Լոս Անջելես այցը երեւանցիների վրա արժեցել է ոչ թե 50, այլ մոտ 70 հազար ԱՄՆ դոլար։ Ավինյանի պատվիրակության տված ընթրիքների ու նվերների, վարձած մեքենայի եւ ուղեւորության այլ մանրամասներ, իհարկե, չեն հրապարակվել, չնայած լուսանկարչական ծառայություններ էլ են գնվել: Գուցե միայն իրենց արխիվի համա՞ր են լուսանկարվել։ Ի դեպ, հայկական միջավայրում ընդունված է, որ սովորաբար հյուրընկալող կողմն է ընթրիք տալիս, ռեստորան հրավիրում: Այս պարագայում Տիգրան Ավինյանը հասել է օվկիանոսից այն կողմ, ոչ մի նշանակալից պաշտոնյայի հետ չի հանդիպել, առանձնապես լուրջ պայմանավորվածություններ ձեռք չի բերել, պայմանագրեր չի կնքել, դեռ մի բան էլ ամերիկացիներին նրանց երկրում պատիվ է տվել ու վերադարձել: Եվ այդ ամենը՝ Երեւանի բյուջեի հաշվին: