Մենք գործ ունենք մի թիմի հետ, որը 5 տարվա աշխատանքը ձախողել է: Այսօրվա ժողովում հնչեցրած նրանց նոր ռազմավարության մասին մտքերն անվստահելի են: Այն թիմը, որն իր նպատակներին չի հասել 5 տարում, վստահություն չի ներշնչում, որ 2 տարում կկարողանա փոխել իրավիճակը»,-ասաց Երվանդ Իսմայիլյանը:

Ֆան ակումբի ներկայացուցիչներն առանձին ներկայացրեցին 2019-2025 թթ. ՀՖՖ ռազմավարության որոշ կետեր, որոնք խախտվել են:

ՖԱՖ շարժման հիիմնադիր Սերգեյ Ջանջոյանի խոսքով, երկրպագուները ՀՖՖ նոր նախագահի թեկնածու չունեն:

«Մեր շարժման առաջին օրվանից գալիս է այն հարցը, թե ում ենք մենք տեսնում ՀՖՖ նախագահի պաշտոնում: Այս ֆեդերացիան, հասկացանք, ձախողել է, չի կարողանում կատարել իր առջեւ դրված խնդիրները: Բոլոր ֆան ակումբներով քննարկումների արդյունքում եկել ենք այն համոզմունքի, որ մենք չենք տեսնում եւ չենք տեսնելու ինչ-որ թեկնածու: Մենք տեսնում ենք համակարգ: Այն համակարգը, որը այդպես էլ կյանքի չկոչվեց այս ֆեդերացիայի նախագահությամբ:

Ունենք մշակած գործողությունների ծրագիր, ճանապարհային քարտեզ: Երբ այս ֆեդերացիան հրաժարական կտա, իսկ դա կարող է լինել 2 կամ 4 ամսից, մենք կառաջնորդվենք մեր ճանապարհային քարտեզով: Մեր պայքարը տանելու ենք մինչեւ այդ օրը, երբ այս թիմը հրաժարական կտա: Այս գլոբալ ձախողումներից հետո չենք հավատում ներկայիս թիմին, որ հաջորդ երկու տարում ՀՖՖ-ն փոխվելու է եւ այս մեծ կառուցողական հարցերին լուծում է տալու: Կարծում ենք, որ շեշտը պետք է դրվի համակարգի վրա: Ֆան ակումբներով մեր մշակած համակարգը հետեւյալն է․

երբ ՀՖՖ նախագահն ու ղեկավար կազմը հրաժարական տա, նշանակվելու են ՀՖՖ առանցքային պաշտոնների ժամանակավոր պաշտոնակատարներ, որոնք պարտավորվում են կազմակերպել 3 արտահերթ ժողով: Առաջին ժողովով ՀՖՖ հիմնադիր անդամների հեռացման հարց ՀՖՖ կանոնակարգի խախտման հիմքով: Խոսքը վերաբերում է այն ֆեյք ՀԿ-ներին, որոնք կան ֆեդերացիայի կազմում: ՀՖՖ հիմնադիր անդամների օրենքի լրամշակում: Ներկա ղեավարության կողմից ներդրած արհեստական սահմանափակումների վերացում, նոր օրենքների մշակում, նաեւ ձայների արդար բաշխման մշակում:

Այստեղ առանցքային հարցն այն է, որ կա արդարության խախտված իրավիճակ: Բոլոր ակումբները կամ ակումբների մի մասն անընդհատ խոսում է այս մասին, բայց այդ խոսակցությունները շրջանցվում են: Օրինակ՝ 40-100 երեխա ունեցող ակումբն էլ ունի քվեարկելու իրավունք, «Փյունիկի» կամ «Ուրարտուի» պես մեծ ակումբներն էլ ունեն քվեարկելու իրավունք եւ նրանք գտնվում են հավասար հարթակում: Պետք է լինի ձայների արդար բաշխում: Օրենքի լրամշակման արդյունքում պետք է ՀՖՖ կազմ ընդգրկել տասնյակ ՀԿ-ներ: Օրինակ՝ հենց ֆան ակումբները պետք է կարողանան ընդգրկվել: Ֆեդերացիայի ղեկավարության վերարտադրվելու գլխավոր խնդիրը ձայների սխալ բաշխումն է: Այս կազմը եկավ, ասաց սա պիտի փոխենք, բայց պահեց նույնը, որ միշտ կարողանա վերարտադրվել: Երբ լինեն բազմաթիվ հկ-ներ ձայների տարբեր բաշխմամբ, չես կարող բոլորին կախման մեջ գցել: Սա կարծում ենք կլինի այն արդար ձեւը, որից հետո ֆեդերացիայի նախագահի ընտրությունները կլինեն անաչառ:

Մեծ մշակած ծրագրում է նաեւ ՀՖՖ նախագահի թեկնածուների սահմանափակման վերանայում: Ամենապարզ օրինակը՝ մեր լեգենդար ֆուտբոլիստ Հենրիխ Մխիթարյանը վերադառնալով Հայաստան եւ ֆուտբոլիստի կարիերան ավարտելով, չի կարողանալու առաջադրվել որպես ՀՖՖ նախագահի թեկնածու:

Առաջին արտահերթ ժողովից մեկ ամիս անց պետք է անցկացվի երկրորդ ժողովը նոր անդամների ընդունման օրակարգով: Նոր անդամները կարող են լինել 150-200: Այս դեպքում ՀՖՖ ղեկավար կազմի վերարտադրությունը դառնում է գրեթե անհնար:

Դրանից մեկ ամիս անց ՀՖՖ նախագահի ժամանակավոր պաշտոնակատարը հայտարարում է երրորդ արտահերթ ժողովի մասին՝ ՀՖՖ նախագահի արտահերթ ընտրությունների օրակարգով: Դրան հաջորդելու է հանրային խորհուրդ, որին կարող են մասնակցել ֆուտբոլի հետ առնչություն ունեցող բոլոր անձինք: Այդ խորհրդում մշակվում է ֆուտբոլի զարգացման ռազմավարություն մեր կորդինացմամբ:

Մեզ ասում են չար ու խուլիգան երկրպագուներն են այս իրավիճակը ստեղծում, որ մեզ միայն մտահոգում է ազգային հավաքականը, այդպես չէ: Մեզ մտահոգում է հայկական ֆուտբոլի ներկա վատ վիճակը: Ինչպես հավատանք մի ղեկավար կազմի, որը ձախողել է անցած տարիների ռազմավարությունը եւ հիմա խոսում է արդեն 2025 թվականի նոր ռազմավարության մասին»,-ասաց Սերգեյ Ջանջոյանը:

Աղբյուրը՝ sport.news.am