Երեկ՝ դեկտեմբերի 28-ին, արտակարգ դեպք է տեղի ունեցել Արագածոտնի մարզում։ Ժամը 22:00-ի սահմանում ՀՀ Ներքին գործերի նախարարության Փրկարար ծառայության 911 ճգնաժամային կառավարման ազգային կենտրոն ահազանգ է ստացվել, որ Երևան-Վանաձոր ավտոճանապարհի Ծիլքար-Ապարան հատվածում ավտոբուս է այրվում։

Ինչպես հայտնում է shamshyan.com-ը, մինչ կժամանեին Արագածի հրշեջ-փրկարարական ջոկատից 2 մարտական հաշվարկ, Iveco մակնիշի ավտոբուսում առաջացած կրակի տարածման դեմ փորձել են պայքարել վարորդն ու քաղաքացիները, ապա՝ ժամանած Արագածի հրշեջ-փրկարարները, սակայն ավտոբուսը ամբողջությամբ վերածվել է մոխրակույտի։

Դեպքի փաստով ոստիկանության Ապարանի բաժնում փաստաթղթեր են ձևակերպվում։

Տեղում ոստիկաններն ու պարեկները պարզել են, որ ավտոմեքենան վարել է Վրաստանի Հանրապետության քաղաքացի, ազգությամբ վրացի 34-ամյա Նիկա Մոդեբաձեն։

Ըստ նախնական տեղեկությունների, տուժածներ չկան։