Քաղաքագետ Լևոն Մելիք-Շահնազարյանի խոսքերով՝ կովկասյան տարածաշրջանում շատ լուրջ աշխարհաքաղաքական փոփոխություններ են սպասվում, որտեղ «Հայաստանի դերը շատ փոքր է՝ նա օբյեկտ է, այլ ոչ թե սուբյեկտ»։

-Ես համաձայն եմ Վարդան Օսկանյանի երեկվա հայտարարության հետ, որ Հայաստանը հնարավոր է՝ կորցնի Թուրքիայի հետ վարվող բանակցությունների գործընթացի վերահսկողությունը։ Մե՛նք չենք որոշում տարբեր հանդիպումների ձևաչափը և օրակարգը։ Մեզ հրավիրում են և ասում՝ այսինչ  հանդիպումը պետք է լինի, այսինչ հայտարարությունը պետք է արվի,- ասել է քաղաքագետը։

Նա նաև կանխատեսել է, որ անցած տարի մարտի 14-ին ՄԱԿ-ի ընդունած հայտարարության համեմատ, ՄԱԿ-ի գլխավոր ասամբլեայի առաջիկա նիստում շատ ավելի վատ բանաձև կընդունվի։

-Քննարկվելու է Ադրբեջանի «օկուպացված» տարածքների հարցը։ Այս բանաձևն ավելի վատն է լինելու, որովհետև, կարելի է հստակ համոզված ասել, որ այս անգամ կողմ են քվեարկելու երեք համանախագահող պետությունները՝ Ֆրանսիան, ԱՄՆ-ը և Ռուսաստանը։ Այս անգամ կողմ կքվեարկեն, որովհետև իրենց բոլոր ցանկությունները, այդ թվում Ադրբեջանի տարածքային ամբողջականության հարցը, այդ բանաձևի մեջ արդեն կան։

Լևոն Մելիք-Շահնազարյանն ասում է, որ դա ՀՀ ԱԳՆ-ի և ողջ դիվանագիտության «մեծ  մինուսն է»։