Իրանը դեմ է իր միջուկային ծրագրի շուրջ ուղիղ բանակցություններ վարելու ԱՄՆ-ի պահանջներին կամ ռմբակոծության ենթարկվելուն՝ նախազգուշացնելով հարևաններին, որոնց տարածքում տեղակայված են ամերիկյան բազաներ, որ նրանք կարող են հայտնվել կրակի գծում, եթե ներգրավվեն դրանում, հայտարարել է իրանցի բարձրաստիճան պաշտոնյան:

Ինչպես հաղորդում է «Արմենպրես»-ը, չնայած Իրանը մերժել է ԱՄՆ-ի նախագահ Դոնալդ Թրամփի ուղիղ բանակցությունների պահանջը, Թեհրանը ցանկանում է անուղղակի բանակցությունները շարունակել Օմանի միջոցով, որը մրցակից պետությունների միջև կապի վաղեմի ուղի է: Այդ մասին հայտարարել է պաշտոնյան, որը Reuters-ի հետ խոսել է անանունության պայմանով:

«Անուղղակի բանակցությունները հնարավորություն են տալիս գնահատել Իրանի հետ քաղաքական կարգավորման հարցում Վաշինգտոնի մտադրությունների լրջությունը»,-ասել է պաշտոնյան:

Չնայած այդ ճանապարհը կարող է «քարքարոտ» լինել, նման բանակցությունները կարող են սկսվել մոտ ապագայում, եթե ԱՄՆ-ն աջակցի դրանց, ասել է պաշտոնյան:

Իրանը ծանուցագրեր է ուղարկել Իրաքին, Քուվեյթին, Արաբական Միացյալ Էմիրություններին, Քաթարին, Թուրքիային և Բահրեյնին առ այն, որ Իրանի վրա ԱՄՆ-ի հարձակմանը ցանկացած աջակցություն, ներառյալ՝ հարձակման ժամանակ ամերիկյան զինվորականների կողմից իրենց օդային տարածքի կամ տարածքի օգտագործումը, կդիտվի որպես թշնամական գործողություն, ասել է պաշտոնյան:

Նման արարքը «նրանց համար լուրջ հետևանքներ կունենա», ասել է պաշտոնյան՝ հավելելով, որ գերագույն առաջնորդ Այաթոլլա Ալի Խամենեին Իրանի զինված ուժերը բարձր պատրաստվածության վիճակի է բերել: