Արդեն երկու օր է, ինչ Շիրակի մարզում առատ տեղումներ են, որոնք ուղեկցվում են ուժեղ քամով: Երեկ գիշերվա ձնաբքի պատճառով մարզի մի շարք միջհամայնքային ճանապարհներ անանցանելի են դարձել:

Թեև մարզային իշխանությունները վստահեցնում են, որ աշխատանքներ են կատարում ճանապարհներն անցանելի դարձնելու ուղղությամբ, սակայն գործնականում հակառակ պատկերն է: Մասնավորապես սաստիկ բքի պատճառով գիշերվանից փակվել է Գյումրի-Վահրամաբերդ ճանապարհը, որի հետևանքով մի քանի ավտոմեքենա մինչև այսօր՝ ժամը 12-ի սահմանները, մնացել է ձյան մեջ թաղված: Իսկ առավոտվանից Գյումրի-Վահրամաբերդ ճանապարհին բազմաթիվ ավտոմեքենաներ են թաղվել ձյան մեջ: Չնայած որ տիրող իրավիճակի մասին տեղյակ է պահվել մարզային իշխանություններին և արտակարգ իրավիճակների վարչությանը, սակայն մինչև օրվա կեսը ոչ մի միջոցառում չի ձեռնարկվել: Ինչպես պնդում են Վահրամաբերդից ոտքով Գյումրի աշխատանքի շտապող քաղաքացիները, ճանապարհին տեղ–տեղ ձյան բարձրությունը հասնում է 4 մետրի:

«Առավոտվանից չենք կարողանում գյուղ հասնել, արդեն մոտ երկու ժամ էլ կանգնած ենք, որևէ օգնություն չկա»,–ասել է ճանապարհին ձյան մեջ թաղված վարորդներից մեկը:

Ճանապարհի տարբեր հատվածներում թաղված ավտոմեքենաների թիվն անցնում էր մեկ տասնյակից: Նույնիսկ ձյուն մաքրող մեքենան ամբողջ գիշեր թաղված է մնացել, որի վարորդն առավոտյան ճարահատյալ քնել էր:

Դերենիկ Մալխասյան

Գյումրի