Այսօր ՀՅԴ «Արամ Մանուկյան» կենտրոնի երիտասարդական ակումբում հանդիպման ժամանակ ՀՅԴ խմբակցության ղեկավար Վահան Հովհաննիսյանն անդրադառնալով երկրի ներքաղաքական իրավիճակին, մասնավորապես՝ նախընտրական պայքարին՝ նշել է, որ հնարավոր է՝ ՀՅԴ-ն համագործակցի այլ ընդդիմադիր կուսակցությունների հետ:

-Ես չեմ բացառում, որ համագործակցությունը կարող է ուրիշ ձևեր էլ ընդունել: Օրինակ` «Ժառանգությունը» կարող է մեծամասնականով պատգամավորի թեկնածություն դնել, իսկ մենք պաշտպանենք նրան և հակառակը,–ասել է նա:

Պատասխանելով հարցին, թե ի՞նչ դիրքորոշում ունի ՀՅԴ-ն այն օրինագծի վերաբերյալ, որով արտակարգ իրավիճակը երկրում հայտարարվելու է նախագահի որոշումով՝ Վահան Հովհաննիսյանը նշել է.

–Դաշնակցությունը կտրուկ դեմ է այդ օրենքի ընդունմանը և դեմ է լինելու երկրորդ ընթերցմամբ քննարկման ժամանակ: Բայց, մինչ այդ քննարկումը, ֆրակցիան այս օրենքի մեջ երկու կարևորագույն փոփոխություններ մտցնելու առաջարկություններ է ներկայացրել: Մեկը վերաբերում է զորքերի օգտագործմանը: Հնարավոր է, որ երկրում ստեղծվի այնպիսի մի իրավիճակ, որ սահմանադրական կարգին սպառնալիք լինի և առկա ոստիկանական ուժերը չբավարարեն: Դա կնշանակի, որ այդ ոստիկանական ուժերը պետք է վերանայել, վերազինել, վերակազմավորել և դարձնել ավելի գրագետ: Բայց ոստիկանական այդ պակասը չի կարելի լրացնել բանակի օգտագործմամբ: Երկրորդ խնդիրն այն է, թե ով է որոշում՝ արդյոք իրավիճակն արտակա՞րգ է: Ըստ այս օրինագծի` միայն նախագա՛հը: Մեր առաջարկն է, որ խորհրդարանի նիստը, որը պիտի տեղի ունենա արտակարգ իրավիճակ հայտարարելուց անմիջապես հետո, իրավունք ունենա փոփոխություններ մտցնել նախագահի հրամանի մեջ: Դեռ իշխանությունը չի ուզում այդ առաջարկն ընդունել:

7or.am