– Անընդունելի է, որ որևէ քաղաքական ուժ զորքը օգտագործի իր սեփական շահերի պաշտպանության համար,–լրագրողների հետ հանդիպման ժամանակ ասել  է Ազգային ժողովի ՀՀԿ խմբակցության պատգամավոր Ռաֆիկ Պետրոսյանը, ապա հավելել,–այդ օրինագծի 9–րդ հոդվածի 5–րդ կետը, ըստ որի զինված ուժերը կարող են օգտագործվել հանրահավաքները սահմանափակելու նպատակով, հակասում է Սահմանադրությանը։

Հիշեցնենք, որ Ռաֆիկ Պետրոսյանը միակն է ՀՀԿ խմբակցությունից, ով քննադատել և դեմ է քվեարկել «Արտակարգ դրության իրավական ռեժիմի մասին» օրենքի նախագծին։

Լրագրողի այն հարցին, թե ինչպես են գործընկերները գնահատել իր քայլը,  Պետրոսյանը պատասխանել է.

– Իմ կուսակից գործընկերներից շատերը քվեարկությունից հետո մոտեցել և ասել են, որ ես ճիշտ եմ, բայց իրենք ճար չունեն։

– Մարտի 1-ին նմանատիպ օրենք չկար, բայց զորքը, միևնույն է, օգտագործվեց։ Չեմ կարծում, որ նման օրենքի բացակայության պայմնաններում որևէ մեկը դեմ լինի զորքի օգտագործմանը բնական աղետների հետևանքների վերացման նպատակով,–նույն հանդիպման ժամանակ նշել է ԱԺ նախկին պատգամավոր Աղասի Արշակյանը։

7or.am