Անդրադառնալով Կարապետ Ռուբինյանի «ֆեյսբուքյան» «3Ա» նախաձեռնությանը' ՀՀ նախկին արտգործնախարար, ՀԱԿ անդամ Ալեքսանդր Արզումանյանն ասել է, թե դա շատ նորմալ նախաձեռնություն է։

-Դեռ չեմ լսել, որ դա խոսում է ՀԱԿ-ի պառակտման մասին։ ՀԱԿ-ում ներկայացված են տարբեր ուժեր։ Ես ինքս ազատական եմ և միշտ ցավով նշել եմ, եթե նահանջ է արձանագրվել ազատականության դաշտում,-ասել է Ալ. Արզումանյանը և նշել, որ այդ նախաձեռնությունն ազատականների ներուժն օգտագործելու համար։

Այդ նախաձեռնությունն ազատականության ազդեցության վերականգնմանն ուղղված բան է, որը, հաջողելու դեպքում, շարժմանը մեծ ներուժ կհաղորդի.

-Չպետք է ամեն մի նախաձեռնության մեջ վատ բան փնտրենք, նախ պետք է հասկանալ... Չէ՞ որ դա շատ պարզ նախաձեռնություն է։

Նա նշել է, որ ինքը, Կ. Ռուբինյանի ընկերն ու համախոհը լինելով, կարող է միայն ենթադրել, որ նա, հավանաբար տեսնելով, որ մայր կուսակցությունում՝ Հայոց համազգային շարժումում, որը պետք է Հայաստանում ազատականության ավանգարդը լինի, նահանջ է արձանագրվել, և քանի որ ամռանն էլ հայտարարել էր, թե այլևս դուրս է գալիս կուսակցության շարքերից, միգուցե փորձում է կուսակցությունից դուրս գործել։

-Շատ դրական և ողջունելի նախաձեռնություն է, և ուզում եմ ընդգծել, որ սա զուտ վիրտուալ դաշտում է։ Եթե 2 վիրտուալ բաներ համեմատենք, կարող է լինեն հակասության պահեր, բայց կա գործող, ակտուալ ընդդիմություն և վիրտուալ ինչ-որ համախմբում,-ընդգծել է նա։

Նա նշել է, թե ինքը՝ որպես ազատական, ցանկանում է, որ Կարապետ Ռուբինյանն «ունենա իրավունք արտահայտվելու՝ վիրտուալ, ակտուալ, բոլոր տարածքներում, և որևէ մեկը չհամարձակվի նրան դա արգելել», իսկ թե նախաձեռնությունից ինչ կստացվի, ցույց կտա ժամանակը։

Ալեքսանդր Արզումանյանը «Ֆեյսբուքում» Կարապետ Ռուբինյանի  ստեղծած «3Ա»-ի էջին «Like» է տվել և մտել է այդ խումբը։

-Ես կցանկանայի, որ բարի երթ մաղթենք այդ խմբին և ոչ թե փորձենք թաղել դեռ չծնված,- եզրափակել է նա։

7or.am