Մեր  թղթակցի հետ զրույցում «Ժառանգություն» կուսակցության նախագահ Րաֆֆի Հովհաննիսյանն անարժանահավատ և պատվիրովի է գնահատել «Հայաստանի եվրոպացի բարեկամներ» կազմակերպության վերջերս ներկայացրած սոցհարցման արդյունքները: Հիշեցնենք, որ ըստ այդ կազմակերպության տվյալների՝ «Ժառանգություն» կուսակցությունն վարկանիշը մոտ 4% է։ ԲՀԿ–ն, ըստ նրանց ունի 41%–անոց վարկանիշ, իսկ ՀՀԿ–ն՝ 37% (տե՛ս http://www.eufoa.org/uploads/OpinionPoll_AM.pdf):

«Հայաստանի եվրոպացի բարեկամների» տվյալներով՝ Սերժ Սարգսյանը որպես նախագահի թեկնածու մի քանի անգամ գերազանցում է իր պոտենցիալ մրցակիցներին՝ հավաքելով 33%։ Րաֆֆի Հովհաննիսյանը որպես նախագահացու 2%-անոց վարկանիշ ունի։

Ուշագրավ է, որ «Հայաստանի եվրոպացի բարեկամներ» կազմակերպությունը սերտորեն առնչվում է «ժառանգության» համամասնական ցուցակի 6–րդ համարը զբաղեցնող և նախագահականն նստավայրի հետ համագործակցող «Մարդկային զարգացման միջազգային կենտրոն» ՀԿ տնօրեն Թևան Պողոսյանի հետ։ Մամուլում հրապարակում կա նույնիսկ այն մասին, որ «Հայաստանի եվրոպացի բարեկամները» «դե ֆակտո» կառավարվում է նախագահական նստավայրի երիտթևի կողմից, իսկ դրա հիմնադիրներից է հանդիսանում նույն Թևան Պողոսյանը։

Դատողություններն ու եզրակացությունները թողնում ենք ընթերցողին։

Ստորև ձեզ ենք ներկայացնում Րաֆֆի Հովհաննիսյանի հետ հարցազրույցը, որտեղ նա խոսել է սոցհարցումների և քաղաքական գործընթացներում «ժառանգության» ակնկալիքների մասին։

–Երեկ Անահիտ Բախշյանը հայտարարեց, որ առաջիկա ընտրություններում «Ժառանգությունը» 50% ձայնի հավակնություն ունի։ Իսկ եթե պարզվի, որ «Ժառանգությունը» մեկ զրո պակաս ունի, ի՞նչ եք անելու՝ փողո՞ց եք դուրս գալու, մանդատնե՞րն եք վայր դնելու, թե՞...

–Մենք հիմա ընտրարշավի մեջ ենք և ինքնավստահ ենք. մեր բոլոր ակնկալիքները, չափումները բերում են նրան, որ մենք գնում ենք դեպի հաղթանակ՝ առաջատար դիրք գրավելու։ Ես գիտեմ, որ ա՛յս շրջանում բոլորն էլ նման ցանկություն են արտահայտում։ Ես կարծում եմ, որ մեր դեպքում մի քիչ ավելի լուրջ և հիմնավորված է առաջատար դառնալու մեր ձգտումը, իսկ եթե ազատ, արդար ընտրություններ չլինեն, և այն նվազագույն շեմը, որը ես եմ մինչ այդ արտահայտել (այսինքն՝ իմ կանխատեսած նվազագույնը 25%–ը), չապահովվի (սա ոչ թե որպես կանխավ որոշված թիվ, այլ ժողովրդի կամքը եթե չապահովվի), կարծում եմ՝ հնարավոր բոլոր եղանակներով, ինչպես եղել է «Ժառանգության» հավատամքը, մենք մեր պայքարը առաջ պետք է տանենք։

–Ինչպե՞ս։

–Դուք լավ գիտեք, որ «Ժառանգությունը» եղել է հրապարակում, փողոցում, ամենաանհարմար, վտանգավոր վայրերում, և մենք չենք վախենում։ Դրա համար մենք նախընտրում ենք ընտրական քաղաքակիրթ, օրինավոր արդյունք։ Եթե չէ, մենք կխորհրդակցենք մեր կուսակցական, քաղաքական գործընկերների և քաղաքացիական հասարակության ներկայացուցիչների հետ և կորոշենք, թե ինչպես ենք դրանից հետո տանելու պայքարը։ Բայց կարծում եմ՝ բոլորը գիտեն, որ եթե այս անգամ դա պատահի, Հայաստանի համար ողբերգական հանգրվանի մեկնարկ կլինի։

–«Հայաստանի եվրոպացի բերակամներ» կազմակերպությունը հարցում էր անցկացրել և «Ժառանգությանը» 4% էր տվել։ Նախ՝ այս հարցմանը և կոնկրետ այդ կամակերպությանն ինչպե՞ս եք վերաբերվում։

–Տարբեր տեսակետներ կան թե՛ այդ կազմակերպության, թե՛ այլ հարցումների մասին՝ ով է հիմնադրել, ում ցանկությամբ, փողով, պատվերով։ Դա ինձ չի հետաքրքրում։ Ամեն մեկը տալիս է իր տեսակետը։ Ես ցածր ցուցանիշներից շատ չեմ սրտնեղում, ոչ էլ հակառակը՝ երբ շատ բարձր են ցույց տալիս (ժամանակին «Գելափը» շատ բարձր էր ցույց տալիս մեր ցուցանիշները), ոչ էլ շատ ուրախանում եմ։ Սոցիոլոգիան համայն կարծիք է, որ թերզարգացած է մեր երկրում։ Պետք է  գնահատել բոլոր հարցումները, տեսնել՝ որն է ճշմարիտ, որն է իրականության հատիկ պարունակում, և ըստ այդմ որոշել, թե որ մարտավարությունն ու ռազմավարությունն է։ Կարծում եմ՝ տվյալ դեպքում այդ կազմակերպության ցուցանիշները, չգիտեմ՝ ինչպես են եղել անցյալում, բայց եթե այսօրվա ցուցանիշներն են, շատ հեռու են իրականությունից։

–Այդ կազմակերպությունն ի՞նչ նպատակ է հետապնդել կոնկրետ այս հարցմամբ։

–Չգիտեմ։ Տեղյակ չեմ։

–Նախորդ ընտրությունների համեմատ՝ այս քարոզարշավում ակնհայտ է, որ «Ժառանգությունը» ֆինանսական միջոցների առատություն ունի։ Որտեղի՞ց են այդ գումարները։

–«Ժառանգությունը» երբևե ֆինանսական առատություն չի ունեցել։ «Ժառանգությունն» այն փոքրաթիվ ուժերից է, որ պիտի հարգի օրենքի պահանջը և չծախսի 100մլն դրամից ավելի։ Դրա համար առատության հարց չկա։ Այն իրականության մեջ, երբ ծախսվում են տարբեր կուսակցությունների, հատկապես իշխող կուսակցությունների կողմից միլիոնավոր դոլարներ (դրանց աղբյուրների մասին չեմ խոսի), «Ժառանգությունն» այն փոքրաթիվ ուժերից է, որ ա՛յդ չափով էլ կհարգի օրենքը։

–100 մլն–ն էլ քիչ գումար չի։ Այդ գումարը որտեղի՞ց։

–Այդ գումարը համաքաղաքացիներից, անդամներից, «Ժառանգությունից», «Ազատ դեմոկրատներից», ամեն մեկն օրենքի սահմաններում իր մուծումներով։ Եվ բոլոր դեպքերում մենք այդ շեմը պարտավոր ենք հարգել և ապահովել։ Ի դեպ, ես կողմնակից եմ, որ նոր օրենք լինի, որովհետև մի փոքր իրատեսությունից հեռու է, բոլորը արդեն ծախսում են ավելի։ Միգուցե պետք է հանել այդ առաստաղը կամ բարձրացնել, որ մարդիկ կարողանան օրենք հարգել։ Բայց տվյալ դեպքում դա՛ է օրենքը, և «Ժառանգությունը» հարգելու է այն։

–Իսկ նախորդ ընտրություններին համաքաղաքացիների, անդամների կողմից չէի՞ն արվում։ 2007թ. «Ժառանգության» նախընտրական քարոզարշավն ավելի աղքատիկ էր, իսկ այժմ շատ մեծ պաստառներ եք տպել, վճարովի բոլոր միջոցներից օգտվում եք...

–Անցած անգամ էլ, երբ բացվեց եթերը մեր առջև (մենք քանի տարի չկայինք եթերում, հետո 30 օր հնարավորությունն ընձեռվեց), մենք օգտագործեցինք։ 5 տարի առաջ մենք դիմեցինք մեծ ցուցափեղկերի համար, և մեզ մերժվեց. իրավունք չստացանք որևէ տեղ՝ ո՛չ հանրային, ո՛չ մասնավոր սեփականություն հանդիսացող այդ ցուցանակներում, տեղադրել մեր նկարները։ Մի տեղ ունեինք՝ դեպի Սան գնացող կամուրջ կար, այնտեղ էր մեծ պաստառը, դրանից բացի չկար, և դա ոչ թե մե՛ր ցանկության բացակայության մասին է խոսում։

–Նախագահականի վերահսկողության տակ գտնվող լրատվամիջոցների կողմից հիմա շատ ակնհայտ է դարձել «Ժառանգության» հանդեպ բարեհաճ վերաբերմունքը։ Ինչո՞վ եք սա բացատրում։

–Ես նման բարեհաճություն չեմ տեսնում։ Ես տեսնում եմ՝ թե՛ իշխանական որոշ անկյուններից, իշխանական կոալիցիային պատկանող կամ հարող լրատվամիջոցներից, թե՛ ընդդիմադիր որոշ աղբյուրներից միևնո՛ւյն քննադատությունը, հարձակումները կան մեր ուղղությամբ։ Դրա համար արդար և ամբողջական հարցադրում չէ ասելու համար, որ կա բարեհաճություն։ Կարծում եմ, որ կա շատ հետաքրքիր, չէի ասի՝ կասկածելի, բայց ուշագրավ զուգադիպություն ա՛յդ քննադատությունների, իմ կարծիքով, հերյուրանքների միջև, որոնք մեզ են հասցեագրվում թե՛ իշխանական կոալիցիային հարող լրատվամիջոցներից, թե՛ որոշ ընդդիմադիր։ Կարծում եմ, որ բարեհաճություն չկա, բայց շատերի մոտ կա գիտակցում, որ ... թող քարոզարշավը ինքն իր համար խոսի, ես չասեմ, բայց կարծում եմ՝ մարդիկ հասկանում են, որ «ժառանգությունը» լուրջ մրցակից է, և այդ ամենի վրա արտացոլանքը կարող է լինել։

–«Ժառանգության» և «Ազատ դեմոկրատների» որոշ անդամներ, նույնիսկ Ձեր միացյալ շտաբի պետ Խաչատուր Քոքոբելյանը հայտարարել են, որ թիվ 10 ընտրատարածքում սատարելու են «Նուշիկյան» ասոցիացիայի նախագահին, այլ ոչ թե Սարիբեկ Սուքիասյանին։ Դուք նո՞ւյնպես սատարելու եք Նուշիկյանին, և այդ հայտարարություններին ինչպե՞ս եք վերաբերվում։

–Նախ՝ «Ժառանգությունն» այն վայրն է, որտեղ մեր անդամները, պատգամավորները, ղեկավարները երբ ցանկություն ունեցել են, արտահայտել են անձնական տեսակետներ։ Իհա՛րկե, կուսակցության համար նախընտրելի է, որ այդ անհատական կարծիքներին զուգահեռ՝ լինի ընդհանուր կուսակցական գիծ, որը ժողովրդավարության և ազգային հարցերում շատ հստակ է եղել, իսկ ներկա դրությամբ այդ տեսակետն անձնական է։ Դուք լավ գիտեք, որ մեր բանաձևը շատ հստակ արտահայտված է, և դա եղել է այն պահից, երբ ես կոչ արեցի, որ ամբողջ ընդդիմությունը մեկ միացյալ թեկնածուով հանդես գա յուրաքանչյուր ընտրատարածքում։ Բանաձևում արտահայտված է, որ մենք հաջողություն ենք մաղթում բոլոր թեկնածուներին, անգամ իշխանական, և կոնկրետ հաղթանա՛կ ենք մաղթում ընդդիմադիր թեկնածուներին։ Չի բացառվում, որ ընտրությունների մոտենալուն պես մենք անվանական ասենք մեր զորակցությունները, բայց հիմա հիմք չունենք այդ ընդհանուր կուսակցական զորակցության բանաձևից դուրս գալ։ Մենք ընդդիմադիր բոլոր թեկնածուներին հաղթանակ ենք մաղթում։

–Հիմա Դուք անձամբ Սուքիասյանի օգտի՞ն եք քվեարկելու։

–Իմ քվեն գաղտնի է և պաշտպանված Սահմանադրությամբ։

–Բայց սատարելու մասին հայտարարությունը գաղտնի չէ։

–Ես արդեն ասացի, որ մենք գտնվում ենք այն վիճակում, որ փաստն այն է, որ չունենք յուրաքանչյուր ընտրատարածքում մեկ միասնական ընդդիմադիր թեկանածու։ Եթե այդպես լիներ, շատ ավելի հստակ կլիներ այս հարցի պատասխանը։ Մեր ցանկությունը, առաջարկը ի կատար չեն ածվել, և ներկա դրությամբ մենք ընդհանրապես ասում ենք հաղթանակ ընդդիմադիր թեկնածուներին, և հնարավո՛ր է, որ անդրադառնանք կոնկրետ անունների առաջիկա շաբաթների ընթացքում։

Արեգնազ Մանուկյանը