Երևանի Կենտրոն վարչական շրջանում, Խորենացի և Քրիստափորի փողոցների հատման վայրում “Երևան Ջուր” ՓԲԸ “Արևելք” շահագործման տնօրինության “Կենտրոն” տեղամասի աշխատակիցները ձեռնամուխ են եղել նոր կոյուղու կառուցմանը:

            Ըստ տեղամասի գլխավոր ճարտարագետ Արթուր Զակեոսյանի, շինարարությունը բացատրվում է երկու հանգամանքով: Առաջինը` կոյուղին այստեղ շահագործվում է երկար տարիներ և մասամբ խցանված է, ինչը հաճախակի  վթարների պատճառ է հանդիսանում: Եվ երկրորդը` Երևանի քաղաքապետարանը սկսել է փողոցի ասֆալտապատումը: Ակնհայտ է, որ այս երկու աշխատանքների համատեղումը թույլ է տալիս հետագայում խուսափել փողոցի ծածկույթը վնասելուց:

  Նոր պլաստմասե կոյուղագծի երկարությունը կազմում է 160 մետր, տրամագիծը` 500մմ: Ճիշտ է, արդեն նախկին կոյուղու տրամագիծը 600մմ էր, սակայն պլաստմասե խողովակը նորը լինելուց բացի նաև երկարակյաց է, և Արթուր Զակեոսյանի համոզմունքով, բնակիչների կողմից ճիշտ` ըստ նշանակության, շահագործվելու դեպքում հուսալիորեն կծառայի տասնամյակներ շարունակ:

 Աշխատանքները փողոցում ընթանում են առաջընթաց տեմպերով, նպատակ ունենալով արդեն առաջիկա օրերին կոյուղին հանձնել շահագործման և “ճակատ” բացել ասֆալտապատողների համար: