Շիրակի մարզում տեղի ունեցած «Բարգավաճ Հայաստան» կուսակցության նախընտրական հանդիպման ժամանակ ԲՀԿ նախագահ Գագիկ Ծառուկյանն անդրադարձել է օրինակ սպասարկման որոշ ոլորտների հաստատագրված հարկերին և ասել.

«Եթե այսօր տաքսիստների, փոքր ու միջին բիզնեսի, ասենք, վարսավիրանոցների համար հաստատագրված է, որը պարտադրված է, որ երեք ամիսը միանգամից պետք է վճարի, ինչի՞ համար: Մարդը թող մի ամիս աշխատի, ամսվա վերջում իր հարկերը վճարի: Կարող է մեքենան փչանում է, կարող է, ասենք, վարսավիրանոցը կամ կրպակը փակում է: Ամիսը կաշխատի, իր համապատասխան գումարը կվճարի: Բայց կանխավճարը երեք ամսով է, դա արդեն պրոբլեմ է այս ծանր ֆինանսական ճգնաժամի ժամանակ»:

Ծառուկյանն ընտրողների ուշադրությունն է հրավիրել` ձեզնից է կախված, թե առաջիկա հինգ տարիները դուք ոնց եք ապրելու.

«Մասնակցեք ընտրություններին, ձեր ձայնը տվեք ու պահանջեք: Դա ծանրություն է, եթե մարդը այդ ծանրության տակ մտնում է, նա պետք է լիարժեք ժողովրդի հոգսերով, պրոբլեմներով օր ու գիշեր աշխատի: Եթե չի կարողանում իր հոժար կամքով, թող ժողովրդի անեծքը չվերցնի իր վրա, այլ կարողանա ժողովրդի օրհնանքի խոսքը վերցնել»։

Ինչ վերաբերում է ԲՀԿ-ի մասին տարածվող լուրերին, թե ձայներն իրենցը չեն, դրանք տանելու են, Գ. Ծառուկյանն ընդգծել է.

«Ինչ ձայն կա, մերն է, մենք տեր ենք մեր ձայնին: Մեր ձայները ոչ մեկին չենք տալու, մենք պատասխանատու ենք ժողովրդի առաջ: Ինչ էլ արել ենք ժողովրդի համար, քիչ ենք արել, ավելի շատ ենք անելու: Մենք գանք, առնվազն երեք ամսվա ընթացքում օր օրի դուք դա կնկատեք: Մենք մեր թիմակիցների կողքը կանգնած ենք սարի պես, ոչ մեկը իրավունք չունի իմ թիմակցին նեղացնելու: Կարող է քամի ու փոթորիկ անեն, բայց լիարժեք չեն կարող: Գյուղապետ կլինի, քաղաքապետ կլինի, կպարտադրի, որ ձայնը սրան տվեք, դա անում է իր կաշին փրկելու, իր պաշտոնին մնալու համար: Որ չտվեց, արդյունք չեղավ, իրեն փոխելու են: Խաթրի խնդիր չկա, որ ծանոթ-բարեկամին խաթր անես, ձայնը տաս: Հինգ օր, մի ամիս չէ, դա ամբողջ քո հինգ տարվա, քո ընտանիքի, քո երեխաների ապագան է»։

7or.am