«yerkir.am»–ի փոխանցմամբ՝ Իջևանում տեղի ունեցած նախընտրական հանդիպման ժամանակ ՀՅԴ Հայաստանի Գերագույն Մարմնի ներկայացուցիչ Արմեն Ռուստամյանն ասել է, որ ՀՅԴ-ն գիտի, թե ինչ ծանր վիճակում են ապրում մարդիկ, այդ պատճառով ընդդիմություն է՝ այնտեղ, որտեղ հայ ժողովուրդն է:

«Այսօրվա ծանր իրավիճակի պատճառ ենք համարում գործող իշխանություններին: Իշխանությունները բոլոր ոլորտներում ձախողել են, ցույց են տվել, որ ապաշնորհ են և ինչքան մնան ղեկին, այնքան այս վիճակը խորանալու է»,-ասել է Արմեն Ռուստամյանը՝ զավեշտալի համարելով, որ երկիրն այս վիճակին հասցրած իշխանությունը խոսում է հավատից ու փոփոխություններից.

«Ի՞նչ հավատի մասին է խոսքը, երբ այդ մարդիկ սպանել են հավատը երկրի, իշխանության ու ապագայի նկատմամբ: Արտագաղթը, որ այսօր աչքներիս առաջ է, ամենապերճախոս վկայությունն է իշխանության գործունեության: Ինչպե՞ս կարող է հավատացող մարդը լքել երկիրը և ինչպե՞ս կարող է ակնկալել, որ այս իշխանությունը կփոխվի»:

 Նա վստահ է, որ իշխանությունը փոխել չի կարող, քանի որ իր թիկունքում չունի ժողովուրդին, ժողովուրդը նրանց դեմ է.

«Իշխանությունն օգտվում է այն ռեսուրսից, որ մենք բոլորս ենք ստեղծել: Մեր փոխելու առաջին թիրախը իշխանություններն են: Այս երկրում, եթե պետք է մեկ բան փոխել, առաջին հերթին իշխանությունն է»։

7or.am