«Հայաստանն առանց ընտրակեղծիքների» քաղաքացիական նախաձեռնությունն արդեն իսկ ահազանգել է, որ ՀՀ գլխավոր դատախազ Աղվան Հովսեփյանի եղբայրը, խնամին, ինչպես նաեւ մոտ ընկերներից առնվազն երկուսը մեծամասնական ընտրակարգով առաջադրվել են պատգամավորի թեկնածու: Լրատվամիջոցների համաձայն, գլխավոր դատախազը որոշակի մասնակցություն է ունենում նախընտրական շտաբների գործունեությանը: Բացի այդ, վերոհիշյալ ընտրատարածքներում ստեղծվել է լարված մթնոլորտ, ինչ մտահոգություն է պատճառում: Հաշվի առնելով այս իրողությունը, “Հայաստանն առանց ընտրակեղծիքների” քաղաքացիական նախաձեռնությունը որոշել է օրենքով սահմանված կարգով շուրջօրյա մոնիտորինգի ենթարկել վերոհիշյալ նախընտրական շտաբների աշխատանքը, ինչպես նաեւ իր կամավորների մասնակցությամբ իրականացնել նաեւ լուսանկարահանումներ եւ տեսանկարահանումներ: Մեր կողմից արձանագրված բոլոր օրինախախտումները տրամադրելու ենք արտասահմանյան եւ տեղական դիտորդական խմբերին, դեսպանություններին, ԿԸՀ-ին, բոլոր նախընտրական շտաբներին եւ իրավապահ մարմիններին:

«Հայաստանն առանց ընտրակեղծիքների» քաղաքացիական նախաձեռնություն