Մյունխենի «Բավարիան» անցել է Չեմպիոնների լիգայի եզրափակիչ։ Կիսաեզրափակիչ փուլում «Բավարիան» հաղթանակ է տարել Մադրիդի «Ռեալի» նկատմամբ։ Կիսաեզրափակչի առաջին խաղն ավարտվել էր 2։1՝ հօգուտ «Բավարիայի»։ Պատասխան խաղում նույն՝ 2։1 հաշվով հաղթել է «Ռեալը»։ Մրցավարի ավելացրած ժամանակում էլ մրցակիցները չեն կարողացել վճռել կիսաեզրափակչի ելքը։ Միայն 11–մետրանոց հարվածների շնորհիվ է «Բավարիային» հաջողվել առավելության հասնել «Ռեալի» նկատմամբ՝ 3։1։

Խաղի հաշիվը առաջին խաղակեսի 6–րդ րոպեին բացել է Քրիշտիանու Ռոնալդուն, ով դիպուկ իրացրել է մրցավարի նշանակած 11–մետրանոցը։ Խաղի 14–րդ րոպեին Ռոնալդուն կրկնապատկել է «Ռեալի» առավելությունը։ «Բավարիայի» միակ գոլը 28–րդ րոպեին 11–մետրանոց նշանակետից խփել է Արյեն Ռոբբենը։

11–մետրանոց հարվածաշարում «Բավարիայի» ֆուտբոլիստները իրացրել են 5 հնարավորից 3–ը։ Աչքի են ընկել Ալբան, Գոմեսը և Բաստիան Շվանշտայգերը։ Թոնի Կրոսի և Ֆիլիպ Լամի հարվածները հակադարձել է «Ռեալի» դարպասապահ Իկեր Կասիլյասը։

Մադրիդցիները 5 հարվածից կարողացել են իրացնել միայն մեկը, և դա հաջողվել է Խաբի Ալոնսոյին։ Ռոնալդուի և Կակայի հարվածները հակադարձել է«Բավարիայի» դարպասապահ Մանուել Նոյերը, իսկ Սերխիո Ռամոսը դարպասից բարձր է հարվածել։

Չեմպիոնների լիգայի եզրափակչում Մյունխենի «Բավարիան» կխաղա Լոնդոնի «Չելսիի» հետ, որը կիսաեզրափակիչ երկու հանդիպումների ընթացքում առավելության էր հասել «Բարսելոնայի» նկատմամբ։ Չեմպիոնների լիգայի եզրափակիչը տեղի կունենա մայիսի 19–ին Մյունխենի «Ալյանս Արենա» մարզադաշտում։