Գյումրիում կայացած ՀՅԴ հանրահավաքում ՀՅԴ Բյուրոյի անդամ, ԱԺ ՀՅԴ խմբակցության ղեկավար Վահան Հովհաննիսյանն իր ելույթում նշել է, որ իրենք գյումրեցիներին ոսկե անձրեւ չեն խոստանում, թեև եթե ՀՅԴ-ն խոստանա արծաթե անձրև, այն կգա, որովհետև իրենց խոսքը գործ է: «Մենք գիտեինք, որ շատ դժվար է լինելու մեր հոգնած, հիասթափված մարդկանց բացատրել, որ դուք պարզապես քաղաքացիներ չեք, պարզապես ժողովուրդ չեք, բնակիչ չեք, այլ` ազգ: Եվ այսօր ձեր մեջ արթնացել է քաղաքացին` այն գիտակցումը, որ դուք իսկապես ազգ եք։ Հայաստանում բնակչությունը բաժանված է երկու շերտի` ամեն օր աշխատող, տառապող, բայց աղքատ մեծամասնություն և օլիգարխ, մեծահարուստ, թալանչի փոքրամասնություն: Իսկ այդ երկու շերտերի միջև միջնորդ պետք է լինի պետությունը: Սակայն Հայաստանի Հանրապետության այսօրվա իշխանությունը պետությունը դարձրել է այդ փոքր, հարուստ շրջանակի կցորդ` բոլորովին անտեսելով ժողովրդին: Իշխանությունը պետք է լինի ձեր ծառան, բայց դարձել է փողի ստրուկը»,- հայտարարել է Վահան Հովհաննիսյանը: