ԱՄՆ–ի գաղտնի ծառայության գործակալներին արգելել են աշխատանքից առնվազն 10 ժամ առաջ ալկոհոլ օգտագործել։ Գործակալներին արգելվում է նաև հյուրանոցային համարներ հրավիրել օտար երկրների քաղաքացիներին։ Նման հանձնարարականներ է տարածել գործակալության ղեկավարությունը։

Գաղտնի ծառայության գործակալները պետք է նաև զերծ մնան կասկածելի համբավ ունեցող հաստատություններ այցելելուց, չնայած փաստաթղթում չի մասնավորեցվում, թե որ հաստատություններն են համարվում կասկածելի համբավ ունեցող։ Գործակալները պետք է հետևեն այս նոր կանոններին արտասահմանյան գործուղումների ժամանակ։ Ընդ որում, այն գործակալները, ովքեր գնտվում են նույն հյուրանոցում, որում որ պաշտպանյալ անձն է, պետք է ընդհանրապես  ալկոհոլ չօգտագործեն։

«Ասոշիեյթեդ փրես» պարբերականը գրում է, որ կանոնների խստացումը կապված է ապրիլի կեսին տեղի ունեցած սկանդալի հետ, երբ Գաղտնի ծառայության գործակալները Կոլումբիայում օգտվել էին տեղի մարմնավաճառուհիների ծառայություններից։ Միջադեպի մասնակից 12 գործակալներից 8–ը  աշխատանքից հեռացվել էին։