«Ազատ դեմոկրատներ» կուսակցության անդամ Ալիկ Արզումանյանը հայտարարել է, որ սիրով սատարում և քվեարկելու է թիվ 10 ընտրատարածքում ՀՀԿ-ի կողմից առաջադրած թեկնածուի` Գարեգին Նուշիկյանի օգտին, քանի որ վերջինը, Արզումանյանի խոսքերով, շատ սկզբունքային անձնավորություն է:

-Ես բավական վաղուց եմ ճանաչում Գարեգին Նուշիկյանին: Նա արժանի է, քանի որ 1998 թվականին նա անկախ ամեն ինչից հավատարիմ մնաց իր սկզբունքներին, անհաղորդ մնաց քաղաքական կոնյուկտուրայի պահանջներին և միշտ, մինչև այսօր էլ հավատարիմ է մնում իր ընկերներին, ընկերություն է անում բոլորի հետ՝ անկախ նրանց քաղաքական հայացքներից,-ասել է Ա. Արզումանյանը:

Հիշեցնենք, որ այս ընտրատարածքում ընդդիմադիր ՀԱԿ-ի կողմից առաջադրվել է Խաչատուր Սուքիասյանի եղբայր Սարիբեկ Սուքիասյանը:

Գարեգին Նուշիկյանին սատարելու մասին ավելի վաղ հայտնել էին նաև «Ազատ դեմոկրատներ» կուսակցության անդամ Արարատ Զուրաբյանը և այդ կուսակցության նախագահ, «Ժառանգության» միասնական շտաբի ղեկավար Խաչատուր Քոքոբելյանը, ինչպես նաև Րաֆֆի Հովհաննիսյանը՝ անուղղակիորեն:

Ուշագրավ է, որ «Ժառանգության» գովազդային վահանակներն առատորեն տեղադրվել են Նուշիկյանին պատկանող փողոցային տարածքներում։

7or.am