ՆԱՏՕ–ի գլխավոր գրասենյակը  Իսրայելի կառավարությանը պաշտոնապես տեղեկացրել է, որ այդ երկիրը   մայիսի 20–ին Չիկագոյում կայանալիք ՆԱՏՕ–ի գագաթնաժողովին մասնակցելու հրավեր չի ստանա։ Պաշտոնյաները հատուկ ընդգծել են, որ այս որոշումն ընդունվել է Թուրքիայի կողմից շարունակվող ճնշումների ներքո։

ՆԱՏՕ–ի գլխավոր քարտուղար Անդերս Ֆոգ Ռասմուսենը հայտարարել է, որ Թուրքիայի կարծիքը ծանրակշիռ է, քանի որ թեև Իսրայելը  ԱՄՆ–ի ռազմավարական գործընկերն է Մերձավոր Արևելքում, բայց, ի տարբերություն Թուրքիայի, դաշինքի անդամ չէ։

Հիշեցնենք, որ Թուրքիան դեմ էր արտահայտվում Չիկագոյի գագաթնաժողովին Իսրայելի մասնակցությանը դեռևս ապրիլից։ ԱՄՆ–ի, Ֆրանսիայի, Բրիտանիայի և մի շարք այլ երկրների նախագահներ փորձում էին ազդել Թուրքիայի որոշման վրա և ստիպել հանել արգելքը։ Թուրքիայի նման քայլի պատճառը Իսրայելի գրոհն է «Ազատության նավատորմի» վրա, որի ժամանակ զոհվել էր Թուրքիայի 9 քաղաքացի։ Թուրքիան պահանջում է, որ Իսրայելը պաշտոնապես ներողություն խնդրի այս միջադեպի համար։ Իսրայելը կտրականապես հրաժարվել է դա անել։

ՆԱՏՕ–ի 25–րդ գագաթնաժողովը ամենամեծն է լինելու դաշինքի պատմության մեջ՝ սպասվում է, որ մայիսի 20–ին Չիկագո են գալու 60 երկրների ղեկավարներ։