ԼՂԳ ԱԳՆ մամուլի ծառայությունից տեղեկացնում են, որ մայիսի 16-ին ԵԱՀԿ առաքելությունը Մարտունիի շրջանի Կուրապատկինո բնակավայրի մերձակայքում Լեռնային Ղարաբաղի Հանրապետության և Ադրբեջանի զինված ուժերի շփման գծի պլանային դիտարկում է անցկացրել:

ԼՂՀ Պաշտպանության բանակի դիրքերից դիտարկման խմբի մեջ էին ԵԱՀԿ Գործող նախագահի Անձնական ներկայացուցչի դաշտային օգնականներ Խրիստո Խրիստովը /Բուլղարիա/ և Իրժի Աբերլեն /Չեխիա/, ինչպես նաև բարձր մակարդակի պլանավորման խմբի ներկայացուցիչ /ԲՄՊԽ/ մայոր Վիտալի Բելոկոնը /Ռուսաստան/:

Շփման գծի հակառակ կողմից դիտարկումը գլխավորել է ԵԱՀԿ Գործող նախագահի Անձնական ներկայացուցիչ դեսպան Անջեյ Կասպրչիկը /Լեհաստան/: Դիտարկման խմբի կազմում էին ԳՆԱՆ դաշտային օգնականներ Անթալ Հերդիչը /Հունգարիա/ և Ուիլյամ Փրայորը /Մեծ Բրիտանիա/, ինչպես նաև ԲՄՊԽ ներկայացուցիչ գնդապետ Անդրեյ Բարաշկինը /Ռուսաստան/:

Դիտարկման ընթացքում կրակի դադարեցման ռեժիմի խախտումներ չեն արձանագրվել, սակայն ադրբեջանական կողմը հերթական անգամ ԵԱՀԿ առաքելությունը դուրս չի բերել իր առաջապահ դիրքեր` նախօրոք համաձայնեցված կետ, որի հետևանքով ԵԱՀԿ դիտարկման խմբերը ստիպված են եղել դիտարկում կատարել ավելի հեռու տարածությունից:

Դիտարկման առաքելությանը ղարաբաղյան կողմից ուղեկցել են ԼՂՀ արտաքին գործերի նախարարության և պաշտպանության նախարարության ներկայացուցիչները:

7or.am