Լրագրողների հետ ճեպազրույցում, պատասխանելով այն հարցին, թե արդյոք ինքը կլինի նոր ձևավորվելիք կառավարության կազմում, ՀՀ արդարադատության նախարար Հրայր Թովմասյանն ասել է, թե իր ցանկությունը քիչ է։

«Կառավարությունում ով է լինելու՝ որոշում է նախագահը` վարչապետի առաջարկությամբ: Ես ձեզ այս պահին միայն կարող եմ ասել սահմանադրական այն ընթացակարգերը, որոնք նախատեսված են: Առաջին նիստի օրը ողջ կառավարությունը,  դա նշանակում է վարչապետը եւ նախարարները վայր են դնում իրենց լիազորությունները, բայց ըստ էության իրենք շարունակում են իրենց լիազորությունները, սակայն որպես պաշտոնակատարներ: Առաջին նիստից հետո տասնօրյա ժամկետում, որն ըստ էության կլինի  հունիսի 10-ը, ՀՀ նախագահը,  քննարկելով ԱԺ խմբակցությունների հետ, վարչապետ է նշանակում մեծամասնության աջակցությունը վայելող անձի, որից հետո 20 օրվա ընթացքում վարչապետի առաջարկությամբ ՀՀ նախագահը նշանակում է կառավարության անդամների, որից հետո 20-օրյա ժամկետում կառավարությունն իր գործունեության ծրագիրն է ներկայացնում ԱԺ-ին եւ հաստատվելուց հետո շարունակում է իր լիազորությունները: Սա առավելագույն ժամկետներն են` 50 օր, սակայն փորձը ցույց է տալիս, որ ավելի կարճ ժամանակահատվածում է դա արվում, այսինքն` կարծում եմ հունիսի առաջին տասնօրյակում կնշանակվի  վարչապետը և ձևավորված կլինի նաև կառավարությունը»,–ասել է Թովմասյանը։