Հյուսիսային Կորեան տեղական ժամանակով ժամը 18։12-ին ևս մեկ հրթիռ է փորձարկել։ Սա Կորեայի Ժողովրդադեմոկրատական  Հանրապետության՝ մայիսի 25-ի միջուկային փորձարկումից հետո  արձակված արդեն 5-րդ հրթին է։ Ավելի վաղ Կորեայի Ժողովրդադեմոկրատական Հանրապետության ղեկավարները հայտարարել էին, որ տեղի չեն տա միջազգային ճնշումներին։

ԿԺԴՀ-ի ներկայացուցչը Կորեայի կենտրոնական հեռուստատեսային գործակալության եթերով Կորեայի Ժողովրդադեմոկրատական  Հանրապետության դեմ ավելի կոշտ պատժամիջոցներ կիրառելու մասին ՄԱԿ-ի անվտանգության խորհրդի հռչակագրի դեմ ուղղված իր ելույթում ասել է.  «Եթե ՄԱԿ-ի անվտանգության խորհուրդը կշարունակի սադրանքները, ի պատասխան՝  մենք անխուսափելիորեն կձեռնարկենք մեր հետագա ինքնապաշտպանական քայլերը»։

Ենթադրվում է, որ մայիսի 25-ի միջուկային  փորձարկումն իրականացվել է Հյուսիսային Կորեայի Կիլչժու քաղաքի հյուսիս-արևելքում։ Այդ մարզում գրանցվել է 4,5 մագնիտուդ ուժգնությամբ երկրաշարժ, որի էպիկենտրոնը գտնվել է փորձարկման վայրից 10 կմ հեռավորության վրա։