Հարցազրույց ԲՀԿ խմբակցության անդամ, ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահ Էլինար Վարդանյանի հետ։

-Ձեր գործընկեր Նաիրա Զոհրաբյանն այսօր կարծիք է հայտնել, որ ԲՀԿ-ն ճիշտ կանի այլևս չմասնկացի, այն նախաձեռնություններին, որտեղ կլինի «Ժառանգությունը»: Դուք կիսու՞մ եք այդ գնահատականը:

-Ոչ միայն կիսում եմ, այլև պետք է ասեմ, որ այդ տրամադրությունները ԲՀԿ-ում առկա էին նախքան այս ստորագրահավաքը: Ես կիսում եմ նաև իմ գործընկերոջ գնահատականները` «Ժառանգությունը» ինքնուրույն ուժ չէ: Ավելին` «Ժառանգությունը» այլևս քաղաքական ուժ չէ: «Ժառանգության» որոշ հին անդամներ, ովքեր հեղինակություն էին վայելում, անհասկանալի գործարքի արդյունքում դուրս մղվեցին, փոխարենը եկան մարդիկ, ովքեր ունեն այլ առաքելություն, այլ հանձնարարություններ: Սրանք անառարկելի փաստեր են: 

-Իսկ Րաֆֆի Հովհաննիսյանը: 

-Չեմ ուզում այս թեմայի վրա ծանրանալ: Միայն ասեմ, որ Րաֆֆի Հովհաննիսյանը երկրի համար բոլոր կարևոր իրադարձությունների ժամանակ զարմանալիորեն Հայաստանում չի լինում: Երբևէ որևէ կարևոր հարցի վերաբերյալ  մնայուն կարծիք չի հայտնում: Նույնիսկ երեկ ողջ օրվա ընթացքում չէր կողմնորոշվում.  ինքը պատգամավո՞ր է, թե՞ ոչ: Ինքը Հայաստանո՞ւմ է, թե՞  ոչ: 

- Արդյոք, Ձեր դիրքորոշումը նշանակո՞ւմ է, որ ԲՀԿ-ն առաջիկայում խուսափելու է  այլ քաղաքական ուժերի հետ համագործակցությունից: 

-Ամենևին` ոչ: ԲՀԿ-ի կշիռը խորհրդարանում և ԲՀԿ-ի ստացած վստահության քվեն, մեզ պարտադրում են համագործակցել այլ քաղաքական ուժերի հետ` ՀԱԿ-ի հետ, ՀՅԴ-ի հետ, նույնիսկ ՀՀԿ–ի հետ: 

-Նախորդ օրը իր հեռուստահարցազրույցում Դավիթ Շահնազարյանը, փաստրեն, ՀԱԿ-ին մեղադրեց դավաճանության մեջ, իսկ մյուս կողմից, հայտարարեց, որ պայքարի թիրախը այսուհետ լինելու է ԲՀԿ-ն: Ինչպե՞ս կմեկնաբանեիք սա։ 

- Կարծում եմ շատ ավելի ճիշտ կլինի, որ Դ. Շահնազարյանին  պատասխանի ՀԱԿ-ը: Ընդ-որում՝  պատասխանը պետք է լինի լիարժեք և սպառիչ: ՀԱԿ-ի լռությունը այս պարագայում կլինի անհասկանալի: ԲՀԿ-ի մասով ասեմ, որ մեր դեմ մանր մունր խոսացողներն այնքան շատ են, որ մի Շահնազարյանով ավել կամ պակաս` իրավիճակը չի փոխվում: 

-Բայց Դ. Շահնազարյանը իր հարցազրույցում ուղղակիորեն հորդորում էր իշխանություններին քայլեր ձեռնարկել «Ծառուկյան» բարեգործական հիմնադրամի գործունեության դեմ: 

-Ցավում եմ, որ մեր երկրի մի ժամանակվա ԱԱԾ ղեկավարը այդպես էլ չաճեց կուսակցական գործակալի մակարդակից:

7or.am