Այսօր Սյունիքի մարզի ընդհանուր իրավասության դատարանում մեկնարկում են Հարթաշեն գյուղի նախկին գյուղապետ Ազատ Ղուկասյանի դեմ հարուցված քրեական գործով դատական լսումները։ Նախկին գյուղապետը մեղադրվում է անառակաբարո գործողություններով զուգորդված, բռնություն գործադրելու սպառնալիքով նույն գյուղի բնակիչ, անչափահաս Ա. Պարոնյանին բռնաբարելու համար։

Հիշեցնենք`1997 թվականին ծնված Ա. Պարոնյանի հարազատների բողոքի հիման վրա Գորիսի քննչական բաժնում քրեական գործ էր հարուցվել` Քր. Օր.-ի 142-րդ հոդվածի հատկանիշներով. «Ակնհայտ տասնվեց տարին չլրացած անձի նկատմամբ անառակաբարո գործողություններ կատարելը» և 138-րդ հոդվածի 2-րդ մասի 3-րդ կետով` «անչափահասի բռնաբարություն»: Դատաբժշկական ու դատակենսաբանական փորձաքննությունները ցույց էին տվել, որ երեխայի նկատմամբ իսկապես սեռական բռնություն կատարվել է:
Հարթաշենի նախկին գյուղապետ Ազատ Ղուկասյանը Հանրապետական կուսակցության անդամ է, համատեղության կարգով գյուղի դպրոցում աշխատում էր որպես ֆիզկուլտուրայի ուսուցիչ։  Ամուսնացած է, ունի թոռներ: