Մամուլի ասուլիսի ժամանակ ՀՀ նախկին վարչապետ, ՀԱԿ ներկայացուցիչ Հրանտ Բագրատյանն ասել է, որ խոշոր ձեռնարկություններում հարկային մշտական տեսուչի կառույցի ներմուծումը հիմարություն և անհեթեթություն է։ Սակայն, եթե կառավարությունը ՝«կաշառի» պատգամավորներին, այսինքն՝ խոշոր բիզնեսին մի բան զիջի, հանրավոր է, որ խորհրդարանն այդ օրինագիծն ընդունի։

Նա նաև նշել է, որ աշխարհում ընդունված գործելակերպ է հարկային տեսուչի կառույցի այնպիսի կիրառումը, որը եղել է նաև Լևոն Տեր-Պետրոսյանի ծրագրում և որը դեռ 1999թ.-ին Հրանտ Բագրատյանն առաջարկել է կառավարությանը։

-Հիմնարկներում հարկային տեսուչների ինստիտուտ պետք է մտցնել գյուղատնտեսական հումքի վերամշակման սեզոնի ընթացքում, ինչպես նաև հիմնարկ-ձեռնարկություններում, որոնք հանքեր են մշակում,- ասել է Հ. Բագրատյանը՝ հավելելով, որ ԱԺ ներկայացված հարկային օրենսգրքի փոփոխություններում էլ կան քայլեր, որոնք ճիշտ են և որոնք նույնպես եղել են Լևոն Տեր-Պետրոսյանի ծրագրում.

-Այդ օրենսգրքում կան մի շարք կարդինալ քայլեր։ Օրինակ, բացարձակապես ճիշտ է շահութահարկի և եկամտահարկի հավասարեցումը, ճիշտ է  ավելացված արժեքի հարկի դրույթի իջեցումը 20%-ից 18%։ Թող մեծամտություն չթվա, բայց բոլոր այս կետերը եղել են Տեր-Պետրոսյանի ծրագրում։ Մենք տեսնում ենք, որ եթե մի հատ կարդինալ քայլ կա, չեմ ասում բոլորը, բայց, որպես կանոն, այդտեղից են վերցված։

Հ. Բագրատյանի խոսքերով՝ սակայն, ներկայիս կառավաևրությունը ցուցադրում է «կիսատ-պռատ» մոտեցում, ինչը կարող է  ոչ թե օգուտ բերել, այլ ճիշտ հակառակը։

 -Պրոֆեսիոնալ մտածողությունը բացակայում է։ Երբեք ուրախ չեմ եղել կառավարության մակարդակով և ասել եմ՝ ավելի լավ է հենց էնպես խոհուն մեկին դնես, քան թե մարդու, որն իրեն պրոֆեսիոնալ է վկայում, բայց կիսապրոֆեսիոնալ է։ Այդ դեպքում, ստացվում է այնպիսի քաղաքականություն, որը ես անվանում եմ «դամբուլային»։