ԱԺ արտահերթ նիստ հրավիրելու համար անրաժեշտ 44 ստորագրությունն արդեն հավաքվել է։ ՀԱԿ–ի նախաձեռնությանը միացել են «Ժառանգություն», ԲՀԿ, ՀՅԴ խմբակցությունները։ Այսինքն, նոյեմբերի 21-ին՝ ժամը 12:00-ին ԱԺ արտահերթ նիստ կհրավիրվի։

Ինչպես տեղեկացրել էինք՝ քիչ թե շատ ընդունելի ընտրություններ անցկացնելու նպատակով ԱԺ ՀԱԿ խմբակցությունը շրջանառության մեջ է դրել «Ընտանեկան օրենսգրքում», «Բնակչության պետական ռեգիստրի» և «Քրեական օրենսգրքում» փոփոխություններ կատարելու փաթեթ։

–Այս փաթեթը կարելի է չորս խմբակցությունների հավաքական փաստաթուղթը համարել,–լրագրողներին ասել էր ՀԱԿ խմբակցության ղեկավար Լևոն Զուրաբյանը և ավելացրել,–վստահ եմ, որ նույնիսկ եթե նիստը գումարվի, ՀՀԿ-ն ամեն ինչ կանի քվորում չապահովելու համար։ Եվ դա ևս մեկ անգամ ցույց կտա ՀՀԿ-ի դեմքը։ Իլյուզիաներ չունենք՝ իմանալով ՀՀԿ-ի ոճը, զոռբայությունը։ ՀՀԿ-ն չի կարող թույլ տալ իրեն այնպիսի շռայլություն, ինչպիսին մաքուր ընտրություններ են։ 

Եվ իրոք, ՀՀԿ–ն մտադիր է քվորում չապահովել խորհրդարանական ընդդիմության հրավիրած արտահերթ նիստում։ «Yerkir.am»-ի հետ զրույցում ԱԺ ՀՀԿ խմբակցության ղեկավար Գալուստ Սահակյանը միանշանակ հայտնել է, որ ՀՀԿ-ն քվորում չի ապահովելու, ուստի նիստն էլ չի կայանա: 

«Իր ամբողջ գաղափարական, տրադիցիոն ընկալումներով ՀԱԿ-ն արտահերթ նիստ հրավիրել չի կարող, հույսները դրել են ԲՀԿ-ի վրա: ՀԱԿ-ի արածը քաղաքական ակտիվության իմիտացիոն գործընթաց է, որ ոչ մի բան չի տալիս»,-հայտնել է Գալուստ Սահակյանը և ևս մեկ անգամ ընդգծել, որ «Ընտրական օրենսգիրքը» ընտրություններից մի քանի ամիս առաջ չեն փոխում:

ՀՀԿ-ը, ըստ Սահակյանի, «պրիմիտիվ խաղերի կենտրոնում հայտնվել չի կարող», ուստի նիստին էլ չեն գա: 

«Այդ օրը ԱԺ-ում կլինենք, բայց արհեստական այդ խաղի մեջ ներքաշվել չենք կարող»,-նշել է Սահակյանը և ընդգծել, թե ՀԱԿ-ն էլ գիտի, որ ՀՀԿ-ն նիստին չի գա: Դիտարկմանը, թե ՀԱԿ-ը դրա մասին գիտի և ասում է, որ նիստին չներկայանալով՝ ՀՀԿ-ն ևս մեկ անգամ ցույց կտա իր դեմքը, Սահակյանն արձագանքել է. 

«Այս անգամ էլ կերևա, որ ՀՀԿ-ն պրիմիտիվ քաղաքական դիվերսիաների դրսևորումների մասնակից լինել չի կարող»:

7or.am