ՀՀ արտակարգ իրավիճակների նախարարության հրավիրած այսօրվա կոլեգիայի ընդլայնված  նիստը, որը նախագահում էր ԱԻ նախարար Մհեր Շահգելդյանը, մասնակցում էին ՀՀ ազգային անվտանգության խորհրդի քարտուղար Արթուր Բաղդասարյանը,  նախարարության կազմում գործող կառուցվածքային ստորաբաժանումների և գործակալությունների ղեկավարներն ու տեղակալները:

Ներկայացնելով Արտակարգ իրավիճակների նախարարության կոլեգիայի 2009 թվականի գործունեության ծրագիրը, Մհեր Շահգելդյանը կարևորեց համակարգում ընդգրկված բոլոր կառույցների բարեփոխման գործընթացին ուղղված ռազմավարական մոտեցումները, ընդհանուր քաղաքականության, այդ թվում նաև  գերակա ուղղությունների վերաբերյալ տեսակետներ և  առաջարկություններ  ներկայացնելու  փաստը, միաժամանակ շեշտելով պարտականությունների հստակ կատարման այն անհրաժեշտությունը, որը  բխում է երկրի անվտանգության և բնակչության պաշտպանության  շահերից:

Ողջունելով նիստի մասնակիցներին, ԱԱԽ քարտուղար Արթուր Բաղդասարյանը ընդգծեց այն հանգամանքը, որ նախարարության կոլեգիան այսուհետ պետք է դառնա որոշումներ և քննարկումներ կայացնող առավել ակտիվ կառույց: Արթուր Բաղդասարյանը վստահեցրեց, որ աջակցելու և օժանդակելու է նախարարության ցանկացած ոլորտի բարեփոխման գործընթացին:

 Խոսելով  մի շարք խնդիրների մասին, անվտանգության խորհրդի քարտուղարը մատնանշեց  ԱԻՆ տեխնիկական անվտանգության ազգային կենտրոնի հայեցակարգի ընդունման անհրաժեշտությունը, որը պետական նշանակության հիմնահարց է մեր հանրապետությունում: Արթուր Բաղդասարյանը առաջարկեց ԱԻՆ գործունեությունը համապատասխանեցնել միջազգային չափանիշներին, մշակել նոր մոտեցումներ՝ հիմք ընդունելով կոնկրետ գործողությունների իրականացումը:

Ելույթներով հանդես եկան ՀՓԾ տնօրեն Էդիկ Բարսեղյանը, ԱԻՆ տեխանվտանգության ազգային կենտրոնի տնօրեն Աշոտ Պետրոսյանը, ԱԻՆ պետական ռեզերվների գործակալության տնօրեն Ռուդիկ Ղուկասյանը  և այլք:

Ելնելով ԱԻՆ կոլեգիայի գործունեության առավել հրատապ,  արդյունավետ կազմակերպման և հիմնարար հարցերի քննարկման անհրաժեշտությունից, կոլեգիան որոշեց հաստատել ՀՀ ԱԻՆ կոլեգիայի 2009 թ. գործունեության ծրագիրը:

                                                      ԱԻՆ մամուլի ծառայություն