-Այս քաղաքական իրավիճակում համաներումը երկար սպասված և միանգամայն արդարացված քայլ է: Թաքցնելու բան չկա, այն ունի թե՛ մարդասիրական, թե՛ քաղաքական նշանակություն: Այն նաև նոր ազդակ կարող է դառնալ հանրային նպատակադրումները միայն դեպի առաջ և միայն դեպի զարգացում ուղղորդելու նպատակի իրագործման ճանապարհին: Այո՛, համաներումը տարբեր մեկնաբանությունների տեղիք է տվել: Նախ ուզում եմ շեշտել, որ այսօրինակ քաղաքական որոշումների համար չկան ժամանակային սահմանափակումներ, այն պետք է կիրառվի ըստ անհրաժեշտության, և այդ անհրաժեշտությունն իսկապես հասունացել է: Մեզ համար կարևոր է ոչ թե կոծկել խնդիրները, այլ հանգամանորեն վերլուծել դրանք, տալ անաչառ գնահատական, և որ ավելի կարևոր է՝ գտնել համարժեք լուծումներ: Այդ լուծումները չեն կարող համոզիչ լինել, եթե չճշտվեն տվյալ պարագայում համաներման կիրառման հիմնական սկզբունքները: Մենք ձեզ հետ միասին պետք է վստահ լինենք, որ յուրաքանչյուրը ստանում է իր արժանին: Եթե կատարված հանցանքը բնորոշ չէ տվյալ մարդուն, այլ նրա կյանքում եզակի բնույթ է կրում կամ պատահականության որոշ հանգամանքների արդյունք է, ապա պետք է անազատության մեջ գտնվելու շրջանում իր վարքը հաշվի առնելով՝ ուղղելու, ճիշտ ճանապարհին կանգնելու հնարավորություն տրվի,- այսպիսի հայտարարություն է արել Ազգային ժողովի նախագահ Հովիկ Աբրահամյանը:

Մարտի 1-2-ի իրադարձությունների հետ կապված հանցագործություններ կատարած անձանց պատճաչափն այս նախագծով առաջարկվում է կրճատել 1/3-ով, եթե նրանց համար սահմանվել է 5 տարուց ավելի ժամկետով ազատազրկում: ԱԺ նախագահ Հովիկ Աբրահամյանն առաջարկել է հանրապետության նախագահին, այդ հարցում ևս դրսևորել մարդասիրական  մոտեցում  և այդ անձանց նկատմամբ նախատեսել պատժաչափի կրած մասի ավելի մեծ կրճատում՝ ½-ով: Հովիկ Աբրահամյանն ասել է, թե համաներումը չի կարող բոլորին գոհացնել և կան նաև մարդիկ, ովքեր սկզբունքորեն դեմ են համաներմանը, բայց խնդրել է այն շփոթել չհիմնավորված ներողամտության հետ։