Հունիսի 19-ին ԱԺ պատգամավոր, «Ջավախք» հայրենակցական միության նախագահ Շիրակ Թորոսյանին վրացական իշխանություններն արգելել էին մուտք գործել Վրաստան։ Տեղի ունեցածը մեկնաբանելիս Շիրակ Թորոսյանը «7օր»-ին ասել է.

-Ես պատճառը, անկեղծ ասած, չգիտեմ։ Շատ զարմանալի է ինձ համար, թե ինչը կարող է պատճառ հանդիսանալ, որ քաղաքացուն թույլ չտան անցնել սահմանը, հատկապես, երբ երկու պետություների միջև վիզային ռեժիմ գոյություն չունի։ Փաստորեն, դրանով ոտնահարվել է ազատ տեղաշարժվելու իմ իրավունքը։ Սակայն, մյուս կողմից, կարծում եմ, որ պետք է շատ ծանրակշիռ, շատ լուրջ և հիմնավորված պատճառ լինի, որպեսզի թույլ չտան։ Ելնելով որոշ պաշտոնյաների մեկնաբանություններից՝ կարող եմ ենթադրել, որ դա կապված է իմ հասարակական գործունեության հետ։ Սակայն, դա էլ պատճառ լինել չի կարող, քանի որ իրեն ժողովրդավար հորջորջող Վրաստանը, փաստորեն, դեմ է դուրս գալիս խոսքի ազատությանը։ Իսկ ես՝ որպես մարդ, քաղաքացի և ԱԺ պատգամավոր, առաջնորդվում եմ իմ խղճով և խոսքի իմ իրավունքով, ինչը, փաստորեն, անընդունելի է այդ պետության համար։ Ես տվյալ դեպքում անձ չեմ ներկայացնում, ես ներկայացնում եմ «Ջավախք» հայրենակցական միությունը և ՀՀ խորհրդարանը։

Անձնապես Շիրակ Թորոսյանը որևէ խնդիր չունի, և իրեն վատ չի զգում այս միջադեպից։ Նա կարծում է, որ վիրավորանքն ավելի շատ հասցված է Հայաստանի խորհրդարանին և Հայաստան պետությանը։

–Ես գնում էի Նաումանի հիմնադրամի միջնորդությամբ երես առ երես քննարկելու ջավախահայության հիմնախնդիրները։ Քանի որ այդպիսի ուղիղ քննարկումներ տեղի չեն ունեցել, և վրացական խումբը միշտ խուսափել է դրանցից, ես կարող եմ ենթադրել, որ վրացական հատուկ ծառայությունները, որոնց իրավասության ներքո է գտնվում սահմանապահ ծառայությունը, ուղղակի չեն ցանկանում, որ դա եզակի այն դեպքերից լինի, երբ կքննարկվեն ջավախահայության ցավոտ խնդիրները։ Կարծում եմ, խոչընդոտել են այդ պատճառով։

Ըստ Շիրակ Թորոսյանի՝  արտաքին գործերի նախարարությունն արել է այն, ինչ կարող էր։ Տեղեկացվել են նաև հանրապետության բարձրագույն իշխանությունները։ Նա ենթադրում է, որ Միխայիլ Սահակաշվիլիի առաջիկա այցի ընթացքում այդ թեմայով քննարկում կլինի, և կհանվի Վրաստան իր մուտք գործելու արգելքը։

Անդրադառնալով Միխայիլ Սահակաշվիլիի խորհրդական Վան Բայբուրդի «7 օր»–ին տված մեկնաբանություններին՝ Շիրակ Թորոսյանն ասել է.

-Կարծում եմ, այն բոլոր մտքերը, որոնք քծնանք չեն վրացական իշխանություններին, կարող են Վան Բայբուրդի համար հայհոյանք թվալ։ Դա նրա էությունն է։ Իմ գործունեությունը հրապարակային է, բոլոր մտքերս ձայնագրված և տպագրված են, այնտեղ չկա հայհոյանք Վրաստան պետության և ժողովրդի հասցեին։ Կա վրացական իշխանությունների որոշ օղակների նկատմամբ խիստ քննադատություն՝ Ջավախքում հայության իրավունքների ոտնահարման հետ կապված։

Արփի Բեգլարյան