Այսօր տեղի է ունեցել ՀՀ կառավարության նիստ, որը վարել է ՀՀ վարչապետ Տիգրան Սարգսյանը։ Նա անդրադարձել է Կապանում տեղի ունեցած նախորդ՝ արտագնա նիստի որոշ  հարցերի պարզաբանմանը։

«Կապանում մենք ընդունել ենք աննախադեպ որոշումներ, մասնավորապես շուրջ 180 մլրդ դրամի ֆինանսական միջոցների բաշխում տեղի ունեցավ, որը մեր տնտեսության համար ունի էական նշանակություն։ Խոսքը վերաբերում է ռուսական վարկին։ Մենք ձեզ հետ միասին որոշեցինք, թե այդ միջոցները ինչպես պետք է ծախսվեն կոնկրետ ըստ ուղղությունների։ Փիլիսոփայությունը, որն ընկած էր այդ որոշման հիմքում, հետևյալն էր. առաջին՝ մենք պետք է այնպես վերաբաշխենք այդ միջոցները, որպեսզի նպաստենք մեր տնտեսության դիմադրողականության աճին, և երկրորդ, որ այդ միջոցները կարողանանք վերադարձնել։ Այսինքն՝ վերադարձելիության սկզբունքով ենք բաշխել այդ գումարները, ինչը նշանակում է, որ այդ պարտքը մեր պետության վրա կծանրանա այնքանով, որքանով այդ միջոցները ուղղելու ենք անտոկոս ընթացիկ մեր ծախսերին, կապիտալ շինարարությանը»,- ասել է վարչապետը։

Անցնելով օրակարգի հարցերին, ՀՀ կառավարությունը, ի կատարումն իր նախկին որոշումների, ինչպես նաև «Շանհայ էքսպո-2010» համաշխարհային ցուցահանդեսին ՀՀ արդյունավետ մասնակցությունն ապահովելու նպատակով, որոշել է հաստատել ՉԺՀ Շանհայ քաղաքում 2010թ. մայիս-հոկտեմբեր ամիսներին կայանալիք «Բարեկեցիկ քաղաք, բարեկեցիկ կյանք» համաշխարհային ցուցահանդեսին ՀՀ մասնակցության միջոցառումների ծրագիրը։

ՀՀ օրենսդրության համաձայն ՀՀ կառավարությունը որոշել է սահմանել, որ Ռուսաստանի Դաշնությունում Հայաստանի Հանրապետության դեսպանությանը կից գործում է ՀՀ կառավարությանն առընթեր ոստիկանության ներկայացուցիչ՝ ՌԴ-ում ՀՀ դիվանագիտական ներկայացուցչության խորհրդականի կարգավիճակով, հաստատել է ներկայացուցչի գործունեության կարգը։

ՀՀ կառավարությունը դեմ է արտահայտվել ՀՀ Ազգային Ժողովի մի խումբ պատգամավորների օրենսդրական նախաձեռնության կարգով ներկայացրած «Ազգային Ժողովի կանոնակարգ» ՀՀ օրենքում լրացումներ կատարելու մասին ՀՀ օրենքի նախագծին՝ հիմնավորելով իր բացասական եզրակացությունը։
Վերջին երկու օրինագծերը սահմանված կարգով կներկայցվեն ՀՀ Ազգային Ժողով։