2011թ. նոյեմբերին ՄԱԿ-ի կրթության, գիտության և մշակույթի կազմակերպությունը` ՅՈՒՆԵՍԿՕ-ն, կարևորելով ջազի դերը  և նրա դիվանագիտական ազդեցությունը մարդկանց աշխարհի բոլոր անկյուններում համախմբելու հարցում, ապրիլի 30-ը պաշտոնապես  հայտարարեց Ջազի միջազգային օր:

Ջազի միջազգային օրվան նվիրված միջոցառումները գլխավորում են ՅՈՒՆԵՍԿՕ-ի  գլխավոր տնօրեն Իրինա Բոկովան և լեգենդար ջազ դաշնակահար ու կոմպոզիտոր Հերբի Հենքոքը, որը նաև  ՅՈՒՆԵՍԿՕ-ի  միջմշակութային երկխոսության դեսպանն է ու Թելոնիոս Մոնքի անվ. ջազի ինստիտուտի նախագահը:

2012-ի ապրիլի 30-ը ամբողջ աշխարհի համալսարաններում, գրադարաններում, դպրոցներում, համերգասրահներում նշեցին համերգային, կրթական ծրագրերով, սեմինարներով, դասախոսություններով, ջեմ սեյշններով, վարպետության դասերով, ցուցահանդեսներով, ֆիլմերի ցուցադրմամբ և այլ միջացառումներով: Կայացան երեք բարձրակարգ համերգներ`  

ՅՈՒՆԵՍԿՕ - ի Փարիզյան գլխակայանում, ջազի հայրենիք Նոր Օռլեանում և  ՄԱԿ-ի գլխավոր ասսամբլեայի Նյու Յորքյան դահլիճում:

Մասնակիցների շարքում էին համաշխարհային մեծության երաժիշտներ` Հերբի Հենքոկը, Ուինսթոն Մարսալիսը,  Մարկուս  Միլլերը,  Քուինսի Ջոնսը, Սթիվի ՈՒոնդերը, Թոնի Բեննեթը, Ջորջ Բենսոնը, Չակա Խանը, Ջոն Բեսլին, Թերենս Բլանչարդը և այլն: Մասնակցել են  նաև Ռոբերտ Դե Նիրոն, Մայքլ Դուգլասը, Մորգան Ֆրիմանը:

Չնայած, որ 2013-ի Ջազի Միջազգային օրվա քաղաք է հռչակվել Ստամբուլը, ՅՈՒՆԵՍԿՕ-ի  195 անդամ մյուս պետություններում ևս իրականացնելու են ջազային համերգներ և ուսուցողական ծրագրեր` ջազը տարբեր տարիքի և մասնագիտությունների մարդկանց առավել հասանելի դարձնելու նպատակով:

Երևանում նույնպես կկայանան Ջազի Միջազգային օրվան նվիրված համերգներ: Կամերային Երաժշտության Ազգային Կենտրոնը ևս միանում է ջազի համաշխարհային շքերթին և ապրիլի 30-ին ժ. 19.00-ին Կոմիտասի անվ. կամերային երաժշտության տանը ջազային հայտնի ստեղծագործությունների խմբերգային մշակումներով հանդես կգա Երևանի Պետական Կամերային Երգչախումբը, գեղ. ղեկավար և դիրիժոր Հարություն Թոփիկյան: