Տարվա այս եղանակին այսպիսի քամիները բացառություն չեն։ Դրանք լինում են և ներզանգվածային երևույթի արդյունք են,-«7օր»-ի հետ զրույցում խոսելով երեկ տեղի ունեցած փոթորկի մասին՝ ասել է  «Հայպետհիդրոմետ»-ի օպերատիվ հիդրոօդերևութաբանության կենտրոնի պետ Զարուհի Պետրոսյանը։

Նա նշել է, որ մթնոլորտային նման երևույթը պայմանավորված է մեր տարածաշրջանից հյուսիս-արևմուտք գտնվող համեմատաբար ցուրտ օդային զանգվածով։

-Տեղի է ունեցել ցուրտ մթնոլորային ճակատի անցում, դրան գումարվել է տեղական բնույթի ամպագոյացումը, և դիտվել է այն երևույթը, ինչին մենք երեկ ականատես եղանք։ Այս երկու տարածաշրջաններում բավական մեծ ջերմաստիճանային տարբերություն կար. ահա ինչով է պայմանավորված այս երևույթը,- նշել է Զարուհի Պետրոսյանը։

Նրա խոսքերով՝ առաջիկա մեկ շաբաթվա ընթացքում ևս երեկոյան ժամերին սպասվում է քամու ուժգնացում, տեղումներ, կարկուտ։

-Քամու ուժգնությունը՝ այսպես կոչված պիկ արագությունը, եղել է  30 մ/վ, Երևանում գրանցվել է 25 մ/վ, Արմավիրում՝ 22մ/վ։ Մոտակա օրերին տեղումներ և քամու ուժգնացում հիմնականում սպասվում է  Շիրակի, Տավուշի և Լոռու մարզերում,- հավելել է Զարուհի Պետրոսյանը։

7or.am