Սփյուռքի նախարար Հրանուշ Հակոբյանը կոչ է անում «Եվրատեսիլին» քվերակել Գոռ Սուջյանի օգտին: Նախարարության տարածած հաղորդագրության մեջ ասվում է.

«Սիրելի´ հայրենակիցներ: Մայիսի 14-18-ը Շվեդիայի Մալմյո քաղաքում տեղի կունենա «Եվրատեսիլ-2013» երգի մրցույթը, որին Հայաստանից մասնակցելու է երգիչ Գոռ Սուջյանը: Ուստի դիմելով ձեզ՝ խնդրում եմ համախմբվել, հետևել կիսաեզրափակիչ և եզրափակիչ մրցույթներին և քվեարկել մեր երգչի, ձեր Հայաստանի օգտին:

Ես դիմում եմ բոլոր նրանց, ում հոգին լի է հայկականությամբ, ով պատրաստ է իր ներդրումն ունենալու՝ Հայաստան անունը միջազգային մրցույթում բարձր պահելու գործում: Եթե Եվրոպայում ապրող մեր հայրենակիցները փորձեն մասնակցել մեր շարժմանը, եթե մի փոքր ժամանակ գտնեն մեր երիտասարդ երգչին աջակցելու համար, ապա հաղթանակը անխուսափելի կլինի: Յուրաքանչյուր հաղթանակով պայմանավորվում է ազգի հավաքականությունը, հավատն ու միասնականությունը:

Վստահ եմ, որ Հայրենիքի և Սփյուռքի մեր հայրենակիցների տիեզերական էներգետիկան, աղոթքը փոխանցվում է մեր մասնակցին, ուժ, դրական լիցքեր հաղորդում նրան: Ակնհայտ է, որ ձեր բարոյական կորովի, սիրո և ջերմության կարիքն ունի Հայաստանը ներկայացնող Գոռ Սուջյանը՝ մեր տաղանդավոր հայորդին, ում պետք է գոտեպնդենք, ուժ տանք, հավատանք նրա ձիրքին ու տաղանդին, և հաղթանակը մերը կլինի:

Մաղթանքս է, որ Գոռի ելույթը հաղթական հրավառություն առաջացնի Հայաստանի և Սփյուռքի մեր հայրենակիցների սրտերում: Եվ հայի ճակատագրի համար հաղթանակների Մայիսը հաղթական լինի նաև«Եվրատեսիլ-2013»-ով, փայլուն նվաճում արձանագրի, որպեսզի Եվրոպայի երկնակամարում ծածանվի մեր հաղթական Եռագույնը, և հայ ժողովուրդը, ինչպես շախմատիստների հաղթանակների դեպքում, ըմբոշխնի հպարտության բերկրանքը: Իսկ հաղթանակի կարող ենք հասնել ոչ միայն Գոռի կատարումով, այլև մեր միասնականությամբ, մեր քվեարկությամբ: Ակնկալում ենք Ձեր ակտիվ աջակցությունը»:

Հիշեցնենք, սակայն, որ «Եվրատեսիլ-2013»-ին Հայաստանը ներկայցնում է ոչ թե Գոռ Սուջյանը, այլ «Դորիանս» խումբը։