ԱԺ այսօրվա նիստում ՀՅԴ խմբակցության անդամ Վահան Հովհաննիսյանը հիշեցրել է իր երեկվա հարցը ՀՀ վարչապետ Տիգրան Սարգսյանին, թե ո՞վ է պատասխանատվություն կրել նախորդ կառավարության ձախողումների համար։ Վարչապետը հիշատակել էր Աշխատանքի և սոցիալական ապահովության ծառայության ձերբակալված նախկին պետ Վազգեն Խաչիկյանին։

Այսօր ԱԺ ամբիոնից Վահան Հովհաննիսյանը պարզապաբանել է, որ իր հարցը ոչ թե քրեական, այլ քաղաքակա՛ն պատասխանատվության մասին էր։ Իսկ ինչ վերաբերում է Խաչիկյանին, ապա նա, թերևս, փորձել է արդարություն հաստատել:

–Խաչիկյանը երևի մտածել է էսպես՝ եթե էս մարդիկ՝ մահացածներն ու արտագաղթածները, կարող են քվեարկել, ինչի՞ թոշակ չստանան։ Եթե կարելի է իրենց բացակա ձայներն օգտագործել, որպեսզի վերարատադրվեն և մնան իշխանության գլուխ, ինչի՞ չի կարելի այդ մարդկանց օգտագործել պարզապես որպեսզի մի մարդ, ասենք՝ պարոն Խաչիկյանը, հարստանա,- հայտարարել է Հովհաննիսյանը:

Ի դեպ, նրա այս խոսքերը շատ են դուր եկել թե՛ պատգամավորներին, թե՛ ՀՀ կառավարության անդմաներին, որոնք վարչապետ Տիգրան Սարգսյանի գլխավորությամբ նստած են եղել դահլիճում։ Նրանք ծիծաղել և ծափահարել են Վահան Հովհաննիսյանի այս խոսքերը լսելուց հետո, ինչից վերջինս շատ է զարմացել։

–Ես չեմ հասկանում, թե ինչո՞ւ եք ծիծաղում, գոնե դուք,–նայելով կառավարության անդմաների կողմը՝ ասել է Վ. Հովհաննիսյանը։

Կառավարության ներկայացրած նոր ծրագրի մասին խոսելիս էլ Վ. Հովհաննիսյանն ասել է.

–Միջին դասը ստեղծելը ինքնին ռեֆորմ է: Բայց երբ տեսնում ես, որ այդ միջին դասը գալու է և քո դեմ քվեարկի, մտածում ես՝ ավելի լավ է արտագաղթի: Ինչո՞ւ պետք է փորձեմ կրթել ժողովրդին: Անգրագետ, իր հոգսերի մեջ կաշկանդված մասսային ավելի հեշտ է կառավարել: Այդ դեպքում թաղի խուժանը կգա և կպահի իշխանությունը: Այ սա՛ է: Պետք է ընտրել՝ իշխանությունը միջո՞ց է, թե՞ նպատակ: ՀՀԿ մեծ գաղափարախոս Գալուստ Գրիգորիչն իր ելութներից մեկում ասաց, որ ձեզնից լավը չկա: Հավանաբար՝ կառավարությունն այս բանը լուրջ է ընդունել: Սա գրիգորիչական շուլուխ ա եղել, լուրջ մի ընդունեք: Դուք պետք է ապացուցեք, որ ամենավատը չեք, որովհետև բոլոր նախորդ կառավարությունները ձեր ֆոնի վրա սկսում են լավը թվալ։

7or.am