Հուլիսի 7-ին Գավառի քաղաքապետարանից տեղեկություն է ստացվել, որ հուլիսի 4-ի լույս 5-ի գիշերը ինքնափլուզվել է քաղաքի բնակիչ Վ.Ավագյանին պատկանող տան մի մասը:

Դեպքի վայր է մեկնել մարզային փրկարարական վարչության փրկարար ջոկատը:

Պարզվել է, որ փլուզվել է 1950-ական թվականներին կառուցված, 50 քմ ընդհանուր մակերեսով տան 6 մ երկարությամբ հետնապատը, վնասվել 20 քմ մակերեսով տանիքը, ինչի հետևանքով փայտյա տանիքածածկը հենվել է պահարանին:

Զոհեր ու վիրավորներ չկան, սակայն տունը վտանգավոր է բնակության համար:

Գավառի քաղաքապետարանը միջոցներ է ձեռնարկում' տուժած ընտանիքին օգնություն ցուցաբերելու ուղղությամբ:

 Նույն օրը, ժամը 21.55-ին ահազանգ է ստացվել, որ ինքնափլուզվում է Գյումրի քաղաքի Աբովյան 135 հասցեում գտնվող երկհարկանի սեփական տան երկրորդ հարկը:

Դեպքի վայր են մեկնել մարզային փրկարարական վարչության փրկարար ջոկատը և օպերատիվ խումբը:

Տեղում պարզվել է, որ փլուզվել է Վ. Մովսեսյանին պատկանող, 1882 թ. կառուցված քա­րաշեն երկհարկանի տան տանիքի մոտ 4 քմ մակերեսով միջին հատվածը:

Տան երկրորդ հարկը 1988 թվականից եղել է չբնակեցված:

Առաջին հարկում բնակվող Միլիտոսյանների 5-հոգանոց ընտանիքը տարահանվել է, տարածքն արգելափակվել է:

Դեպքի մասին տեղյակ է պահվել Գյումրու քաղաքապետը: