Քիչ առաջ Հանրային ծառայությունները կարգավորող հանձնաժողովը միաձայն հաստատեց գազի նոր սակագինը՝ 1 խմ-ի դիմաց 156 դրամ։ Այս սակագնում հաշվի է առնված նաև կառավարության կողմից 30% սուբսիդավորումը՝ սահմանին գազն արժենալու է 270 դոլար։

Մեկ այլ որոշմամբ հանձնաժողովոը որոշեց, որ բնակչության համար էլեկտրաէներգիայի ցերեկային սակագինը հուլիսի 7-ից կսահմանվի 38 դրամ/կՎտժ, իսկ գիշերային սակագինը` 28 դրամ/կՎտժ, հայտնում է «Սիվիլնեթը»:

Ըստ ՀԾԿՀ Սակագնային քաղաքականության վարչություն պետ Գարեգին Բաղրամյանի` արտադրող կայանների սակագնի վերանայումը պայմանավորված է գազի գնի բարձրացմամբ, համակարգում աշխատավարձերի բարձրացումով, փոխարժեքային գործոնով և ատոմակայանի վառելիքի գների աճով։ Արդյունքում` վերջնական սպառողների համար էլեկտրաէներգիայի սակագինը բարձրանալու է 8 դրամով կամ 27%-ով 1 կվտ/ժ համար:

«ՀայՌուսգազարդ» ընկերությունն առաջարկում էր գազի սակագինը 132 հազ. դրամից բարձրացնել 221 հազ.–ի։ ՀԾԿՀ–ի որոշմամբ, փաստորեն, այդ սակագինը կբարձրանա մոտ 18%-ով:

Հանձնաժողովի նախագահ Ռոբերտ Նազարյանը հնարավոր է համարում, որ գազի սակագնի բարձրացման պատճառով հասարակական տրանսպորտի գինը բարձրանա 5%-ով:

Նշենք, որ ՀԾԿՀ–ի նիստը ուղեկցվել է հանձնաժողովի շենքի մոտ ընթացող բողոքի գործողությամբ։ Քաղաքացիներին թույլ չեն տվել մասնակցել նիստին, ինչի պատճառով վիճաբանություն է սկսկվել։ Ցուցարարները ստիպված նստել են հանձնաժողովի մոտքի մոտ՝ խոչընդոտելով մարդկանց մուտքը շենք։ Բայց դա էլ չի օգնել, և հանձնաժողովը սկսել է իր նիստը ու հաստատել սակագինը։

7or.am