Այսօր Ազգային ժողովում ՀՀ վարչապետ Տիգրան Սարգսյանն անդրադարձել է «Հետք» էլեկտրոնային օրաթերթի հրապարակմանը՝ համաձայն որի «WLISPERA HOLDINGS LIMITED» օֆշորային ընկերության միջոցով ունեզրկվել է գործարար Փայլակ Հայրապետյանը, իսկ այդ ընկերության բաժնետերերից են նաև ՀՀ վարչապետ Տիգրան Սարգսյանը և Նավասարդ արքեպիսկոպոս Կճոյանը։

–Ֆինանսական համակարգի հետ մի քիչ առնչություն ունեցող մարդը կհավաստի, որ սա անհեթեթություն է Ավելի անհեթեթ սխեմա չէր կարող մշակվել։ Այդպիսի անհեթեթություն իմ մտքով չէր կարող անցնել,–ասել է Տ. Սարգսյանը։

Նա պնդել է, որ որևէ մեկի համար դժվար չէ մեկ այլ անձնավորության անունով օֆշորային գոտում ընկերություն ստեղծել՝ առանց նրա համաձայնության.

–Դա օֆշորային գոտիների առանձնահատկությունն է։ Այդպիսի ձեռնարկություններ կարելի է ստեղծել ցանկացած մարդու անունով։ Ես չեմ գրանցել օֆշորային գոտում ձեռնարկություն և որևիցե մեկին լիազորություն չեմ տվել իմ անունից դա անել։ Այս ձևով փողեր չեն լվանում, տարօրինակ գործարքներ չեն անում։

Տիգրան Սարգսյանը պնդել է, թե այդպիսով ցանկացել են իրեն վարկաբեկել։

7or.am