Օրերս «Բլումբերգ» հետազոտական կենտրոնը հրապարակել է մի աղյուսակ, ըստ որի արատավոր երևույթների առավելապես հակված երկրների ցանկում Հայաստանը 4-րդն է Չեխիայից, Սլովենիայից ու Ավստրալիայից հետո:

Այսօրվա ասուլիսին սոցիոլոգ Ահարոն Ադիբեկյանը և հոգեբան Սրբուհի Գևորգյանը հայտարարել են, թե երկրների բարոյականության մասին «Բլումբերգ»-ի ներկայացրած տվյալները խիստ կասկածելի են:

Մանկավարժական համալսարանի հոգեբանության դասախոս Սրբուհի Գևորգյանին հատկապես հետաքրքրում էր, թե ում կողմից է այս հետազոտությունը արված, ինչու են հատկապես մեր և մեր հարևանների տվյալները այդքան կտրուկ աճման և նվազման փոխհարաբերակցության մեջ, արդյոք այստեղ չկա՞ սոցիալական մի պատվեր՝ համաշխարհային հանրության աչքին մեզ ներկայացնել համապատասխան ձևաչափով: Նա մասնավորապես հայտարարել է. «Ես կարծում եմ՝ եթե մենք կարողանայինք հասկանալ այն սոցիալական դիրքորոշումը, որը պատվիրատուն՝ որպես այդպիսին, ունի, և այն մեթոդաբանական հիմքերը, որով կազմակերպվել է, մենք ավելի հստակ կարող էինք և՛ թվային, և ընտրանքային, և՛ հիմնավորածության, և՛ հետևությունների հիմնահարցեր քննարկել»: Ահարոն Ադիբեկյանը նույնպես համաձայն լինելով այս մտքի հետ՝ նշել է. «Հայաստանին հանրության առջև նսեմացնելու քայլ կարող է լինել սա»:

Ադիբեկյանը Հայաստանում թմրամոլության, հարբեցողության, խաղատներ այցելության վերաբերյալ ցուցանիշները ներկայացնելով և դրանք հարևան Վրաստանի ու Ադրբեջանի հետ համեմատելով՝ դրանք անարժանահավատ է որակել: Նա մասնավորապես նշել է, որ «Բլումբերգի» ներկայացնելով՝ Հայաստանում 160 հազ. թմրամոլ կա, մինչդեռ Առողջապահության նախարարության օրեր առաջ հրապարակած վիճակագրության համաձայն՝ նարկոլոգիական ծառայության կողմից հաշվառված է ընդամենը 4332–ը։

Ինչպես Սրբուհի Գևորգյանը, Ահարոն Ադիբեկյան ևս համաձայն չլինելով այդ հետազոտության արդյունքներին՝ հայտարարել է, որ դա «բլեֆ» է, դրա համար էլ պետք է հարցում անել միջզգային կառույցներին՝ իմանալու, թե այդ հետազոտության համար տվյալներ ով է տվել, ինչպես է տվել, աղբյուրները ինչպես են ստացել: Ադիբեկյանը հավելել է, թե դա մեզ համար ազգային արժանապատվության խնդիր է, և դատախազությունը վարչապետի օֆշորային հաշիվների հետ միասին լավ կանի զբաղվի այս տվյալներով ևս:

7or.am