01.07.2013 ● 16:57
15.11.2024 ● 09:26
15.11.2024 ● 08:59
15.11.2024 ● 07:02
15.11.2024 ● 06:54
14.11.2024 ● 15:46
14.11.2024 ● 15:38
14.11.2024 ● 15:01
ԱԳ նախարարի տեղակալն ընդունեց Ատոմային էներգիայի միջազգային գործակալության տնօրենի տեղակալին
Հուլիսի 1-ին ՀՀ ԱԳ նախարարի տեղակալ Աշոտ Հովակիմյանն ընդունեց Ատոմային էներգիայի միջազգային գործակալության (ԱԷՄԳ) տնօրենի տեղակալ, տեխնիկական համագործակցության ստորաբաժանման տնօրեն Կուակու Անինգին:
Զրուցակիցները փաստեցին, որ Հայաստանը ԱԷՄԳ համար հուսալի գործընկեր է, եւ ԱԷՄԳ կողմից Հայաստանին տրամադրվող տեխնիկական աջակցությունը ծառայում է իր նպատակին` ուղղված լինելով ՀԱԷԿ տեխնիկական վերազինմանը եւ անվտանգության ամրապնդմանը: ԱԷՄԳ աջակցությամբ յուրաքանչյուր տարի վերապատրաստվող հայ մասնագետները ծանոթանում են միջուկային ոլորտի զարգացումներին եւ ձեռք բերում անհրաժեշտ գիտելիքներ ու փորձ, որը նրանց հնարավորություն կընձեռի այլ երկրներում հանդես գալու որպես փորձագետներ:
Կարեւորելով իր առաջին այցը Հայաստան` Կ. Անինգը նշեց, որ ԱԷՄԳ-ը մեծ նշանակություն է տալիս վերահսկողական մեխանիզմների արդյունավետ կիրառմանը, քանի որ դրանք միջուկային անվտանգության ապահովման հենասյունն են: Կ. Անինգն ընդգծեց, որ Հայաստանը ոչ միայն շահում է ԱԷՄԳ տեխնիկական համագործակցության ծրագրից, այլ նաեւ դրանում ունենում իր կարեւոր ներդրումը:
Փոխնախարար Հովակիմյանը շեշտեց, որ Հայաստանը կարեւորում է ԱԷՄԳ հետ հարաբերությունների հետագա սերտացումը` Հայկական ատոմակայանի անվտանգության շարունակական եւ հետեւողական ամրապնդման, ինչպես նաեւ նոր ատոմակայանի կառուցման տեսանկյունից: