Երևանի կրկեսի շենքի վրա 107.9 մլն դրամ են ներդրել, հետո պայթեցրել

● Լրահոս

04.07.2013 ● 13:13

Երևանի կրկեսի շենքի վրա 107.9 մլն դրամ են ներդրել, հետո պայթեցրել

Երևանի կրկեսի` 2011թ. սեպտեմբերին սկսված վերանորոգումը նախատեսված էր ավարտել 2014թ. վերջին: Համենայն դեպս, այս ժամկետն է նշված կառավարության հետ կրկեսի տնօրինության կնքած պայմանագրում:

Պայմանագրով շինարարական աշխատանքներին 1.5 տարի է մնացել, իսկ շենքն այդպես էլ չի կառուցվել: Ավելին` կրկեսի տնօրեն Հովհաննես Գասպարյանը դիմել է կառավարություն` խնդրելով փոփոխել պայմանագրով նախատեսված որոշ դրույթներ: Ընդ որում, խոսքը վերաբերում է ոչ միայն ժամկետներին, այլև ներդրումների ծավալին:

Նշենք, որ դեռևս 14.02.2006թ. կրկեսի տնօրենի և պետական լիազոր մարմնի միջև կնքված մասնավորեցման պայմանագրով կրկեսի տնօրինությունը պարտավորվել էր շենքի վերանորոգման և միջազգային չափանիշներին համապատասխանեցնելու համար ներդնել 650 մլն դրամ:

Ավելորդ չէ նշել, որ կրկեսի ղեկավարությունը թեև հանդիսանում էր դրա սեփականատերը, բայց քանի որ այսպիսի գումարներ չուներ, կրկեսի նոր շենքի կառուցման հովանավոր էր դարձել «Տաշիր գրուպի» սեփականատեր Սամվել Կարապետյանը:

Կառավարության և կրկեսի տնօրենի միջև ստորագրված պայմանագրով նաև ներդրումների հստակ ժամանակցույց էր սահմանվել. մինչև 31.12.2011թ.՝ 100 մլն դրամ, մինչև 31.12.2012թ.՝ 150 մլն դրամ, մինչև 31.12.2013թ՝. 200 մլն դրամ և մինչև 31.12.2014թ.՝ 200 մլն դրամ:

Սակայն այս տարի կառավարություն ներկայացրած գրությամբ Հովհաննես Գասպարյանը խնդրել է պայմանագրում սահմանված ժամկետները երկարաձգել` առաջարկելով ներդրումները կատարել հետևյալ ժամկետներում. մինչև 31.12.2013թ.՝ 193 մլն դրամ, 31.12.2014թ.՝ 200 մլն դրամ և 31.12.2015թ՝. 150 մլն դրամ:

Սակայն փոխվել են ոչ միայն ժամկետները, այլև նվազել է ներդրումների ծավալը: 650 մլն-ի փոխարեն կրկեսի տնօրինությունն առաջարկում է կատարել 543 մլն-ի ներդրում:

Բանն այն է, որ ըստ Հ.Գասպարյանի` 2011թվականի ընթացքում կրկեսի շենքի վերակառուցման նպատակով արդեն կատարվել է 107.9 մլն դրամի ներդրում և մնացել է ևս 543 մլն դրամ ներդնել:

Հիշեցնենք. 2012թ. սեպտեմբերի 8-ին կրկեսի շենքը պայթեցվել էր` տեղում նոր` ավելի հարմարավետ և ժամանակակից շենք կառուցելու նպատակով:

Փաստորեն ստացվում է, որ նախ շենքի վրա 100 մլն-ից ավելի դրամ է ծախսվել, հետո շենքը պայթեցվել է:

Ի դեպ, կրկեսի շենքը պայթեցնելու պատճառների մասին ժամանակին այդպես էլ պաշտոնական սպառիչ բացատրություն չտրվեց: Եվ ահա 1 տարի անց վերջապես բացահայտվում են իրական պատճառները:

Կրկեսի տնօրենը կառավարությանն ուղղված նամակում գրում է. «Իրականացվող հերթական շինարարական աշխատանքների քննարկման արդյունքում (շին. մասնագետների խորհրդով) անհրաժեշտություն է առաջացել ստուգելու շենքի սեյսմակայունության հարցը, ինչի հիման վրա 17.02.2012թ., ստանալով մասնագիտական եզրակացություն, պարզ է դարձել, որ շինարարությունը շարունակելն անհնար է, շենքը սեյսմակայուն չէ և ենթակա է քանդման»:

Պակաս հետաքրքրական չէ նաև կառավարության արձագանքը տնօրենի նամակին. «Հաշվի առնելով այն փաստը, որ շենքի սեյսմակայունության մասին պայմանագրի կողմերից որևէ մեկը չի իմացել, նախկինում կատարված ներդրումների իմաստը կորել է»: Այսինքն` կողմերից յուրաքանչյուրը յուրովի խոստովանում է, որ նման խոշոր շինարարական ծրագիրն իրականացվել է առանց համապատախան փորձաքննությունների և պատշաճ ուսումնասիրությւնների: Արդյունքում 107 մլն-ը ուղղակի փոշիացվել է:

Սակայն կա նաև մեկ այլ վարկած. Նախքան կրկեսի շենքը պայթեցնելը, 2012թ. հուլիսին, նախ պայթեցվեց շենքի գմբեթը` մեկնաբանությամբ, թե շինության հիմնական մասը պահպանվելու է և ծառայելու է նախատեսված նոր կառույցի հիմք: Չի բացառվում, որ շենքի ամրությունը տուժել էր հենց այս առաջին պայթյունից և հետագայում պարզ էր դարձել, որ այն ևս պետք է պայթեցվի:

Սակայն, այս դեպքում ևս եզրահանգումը նույնն է. Շինարարական ծրագիրն իրականացվել է առանց մասնագիտական եզրակացությունների և ուսումնասիրությունների:

Ինչևէ, փաստը մնում է այն, որ այս ամենի արդյունքում փոշիացվել են բավական կլորիկ գումարներ (եթե իհարկե դրանք ի սկզբանե ներդրվել էին), իսկ պատկան մարմինները համապատասխան քայլեր ձեռնարկելու փոխարեն մտածում են պայմանագիրը ստեղծված իրավիճակին հարմարեցնելու մասին:

Կրկեսին առնչվող նախագիծն արդեն ներառված է կառավարության այսօրվա նիստի օրակարգում:

Հեղինակ՝ Նելլի Դանիելյան

Աղբյուրը՝ pastinfo.am

● Այս խորագրի վերջին նյութերը

Սարյան փողոցի շենքերից մեկում խոշոր հրդեհ է բռնկվել

15.11.2024 ● 08:59

Այս պահին՝ Սարյան 1 հասցեում։

18 մլն դրամ քաղցրավենիքի նվեր փաթեթների համար․ քաղաքապետարանի ամանորյա նվերների որակը չի փոխվի. «Ժողովուրդ»

15.11.2024 ● 08:41

Հեղափոխական իշխանիկները շարունակում են «նախկինների» գործողությունները։

Դեմագոգ թալանչիներ են, տրանսպորտի ուղեվարձը 100 դրամից ավելի չի կարող լինել. Անդրանիկ Թևանյան (տեսանյութ)

15.11.2024 ● 08:24

Երևանի իշխանությունների կողմից տրանսպորտի ուղեվարձի թանկացումն անհիմն է ու չպետք է 100 դրամից ավելի լինի:

Հայկական ֆուտբոլը նույն խայտառակ վիճակում է հայտնվել, ինչ Հայաստան պետությունը․ Անդրանիկ Թևանյան

15.11.2024 ● 08:02

Երկուսի ղեկին էլ պարտության խորհրդանիշներն են։

«Հեռացի՛ր», «Հրաժարականն անփուսափելի է». երկրպագուները պահանջում են ՀՖՖ նախագահի հրաժարականը (տեսանյութ)

15.11.2024 ● 07:58

«Հրաժարականն անփուսափելի է»։

Հայաստանի հավաքականը տանը պարտվեց Ֆարերյան կղզիների թիմին (տեսանյութ)

15.11.2024 ● 06:54

Սուրեն Չախալյանի ղեկավարությամբ ընդունեց Ֆարերյան կղզիների թիմին և պարտություն կրեց 0:1 հաշվով։

Հայկական ֆուտբոլը նույն խայտառակ վիճակում է հայտնվել, ինչ Հայաստան պետությունը․ Անդրանիկ Թևանյան

«Հեռացի՛ր», «Հրաժարականն անփուսափելի է». երկրպագուները պահանջում են ՀՖՖ նախագահի հրաժարականը (տեսանյութ)

Դեմ ենք քաղաքային տրանսպորտի մինչև 300 դրամ թանկացմանը․ միացիր, որ փոխենք (տեսանյութ)

● Լրահոս