Այսօր ՄԱԿ-ի գրասենյակում բացվեց Անապատների և անապատացման դեմ պայքարի տասնամյակին (2010 - 2020) նվիրված ցուցահանդես: Բացման հանդիսավոր արարողությանը հայ նկարիչ Պետո Պողոսյանի ավելի քան 25 արվեստի գործեր ներկայացվեցին ՄԱԿ-ի աշխատակցիներին և արվեստասեր հանրությանը:

Ցուցահանդեսում, որը կրում է «Քաղաքային բազմազանություն» վերնագիրը, ցուցադրվեցին Երևանը, Գյումրին և Փարիզը պատկերող ջրաներկ աշխատանքներ: Պետո Պողոսյանի արվեստը գրավեց երիտասարդության, արվեստագետների, միջազգային հանրության, քաղաքացիական ակտիվիստների, մամուլի և լայն հանրության ուշադրությունը:

Արմինե Հալաջյանը` ՄԱԿ-ի Հանրային տեղեկատվության վարչության տեղեկատվության հարցերով պատասխանատուն, ասաց. «Հայ արվեստի և դրա հարուստ ավանդույթների միջոցով մենք ցանկանում ենք հասարակության ուշադրությունը հրավիրել ՄԱԿ-ի համաշխարհային օրակարգում առկա հարցերին: Անապատների և անապատացման դեմ պայքարի ՄԱԿ-ի տասնամյակին նվիրված այս ցուցահանդեսով մենք լրացնում ենք երկրի ջանքներն և հասարակության պահանջները՝ Հայաստանում հաջորդ սերունդների համար կառուցելու և պահպանելու բնապահպանական առումով կայուն քաղաքներ և՛ որպես քաղաքային միջավայր, և՛ որպես առողջ հաբիտատ»:
Նկարիչ Պետո Պողոսյանը նշեց. «Ես բարձր եմ գնահատում իմ արվեստը հանրության ուշադրությանը ներկայացնելու այս հնարավորությունը: Ես կարևորում եմ այն վճռորոշ դերը, որ մենք՝ արվեստագետներս, խաղում ենք մեր հասարակության զարգացման գործում»:
Ցուցահանդեսը բաց կլինի այցելուների համար մինչև 2013թ. հուլիսի 30–ը (ամեն օր բացի շաբաթ և կիրակի օրերից), ժամը՝ 15:00 -17:00–ին:
ՄԱԿ-ի գրասենյակի դռները ավանդաբար բաց են հայ այն արվեստագետների առջև, ովքեր օգտագործում են իրենց ստեղծագործ միտքն ու տաղանդը՝ տարածելու ՄԱԿ-ի արժեքները՝ խաղաղությունը, կայուն զարգացումը, առողջ ապրելակերպը, հարգանքը մարդու իրավունքների նկատմամբ և ձգտումը Հազարամյակի զարգացման նպատակներին: