Խոսելով հուլիսի 17-ին կայանալիք՝ Հայաստանի և Ադրբեջանի նախագահների հանդիպման մասին՝ քաղաքագետ Սուրեն Զոլյանը «Հայելի» ակումբում ասել է, որ կողմերը շատ հեռու են ԼՂ-ի խնդրի լուծումից, և վերնոշյալ հանդիպումը լինելու է հերթականներից մեկը։

Ինչ վերաբերվում է սեղանին դրված սկսզբունքներին, ապա Ս. Զոլյանի խոսքերով՝ դրանք նույնն են, ինչ 1992թ.։ Պարզապես, պետք է այդ սկզբունքների կիրառման հերթականությունը որոշվի, և այսօր դա դառնա բանակցության թեմա։

Քաղաքագետ Երվանդ Բոզոյանի խոսքերով էլ՝ ժամանակն ու ԼՂ-ի այսօրվա «ստատուս-քվոն» աշխատում են Հայաստանի օգտին, իսկ շուտափույթ լուծումն անխուսափելիորեն կհանգեցնի պատերազմի.

-Այն մարդիկ, ովքեր խոսում են շուտափույթ խաղաղության մասին, անուղղակիորեն կարող են դրդել շուտափույթ պատերազմի,- ասել է Ե. Բոզոյանը՝ հավելելով, որ նախևառաջ պետք է լուծվի ԼՂ-ի կարգավիճակի հարցը, իսկ այսօր տարածքների զիջումը կփոխի հավասարակշռությունը, և պատերազմի պատճառ կդառնա.

-Այսօր պատերազմ չկա ոչ թե այն պատճառով, որ մենք կամ ադրբեջանցիները քաղաքական կամք ունենք պատերազմ չհայտարարելու, այլ ուղղակի կա հավասարակշռություն։ Եթե այդ հավասարակշռությունը խախտվում է ինչ-որ մեկի օգտին, ապա անխուսափելիորեն առաջանում է պատերազմը։

7or.am