Երեկ Կարեն Դեմիրճյանի անվան Երևանի մետրոպոլիտենի մի խումբ աշխատակիցներ, որոնք հրաժարվեցին ներկայանալ, «7օր»-ի հետ զրույցում պնդում էին, որ այս ամսից իրենց աշխատավարձերի հետ տրվող հավելավճարները կրճատվել են 50 տոկոսով, Մետրոպոլիտենի ղեկավարությունն աշխատակիցներին առաջարկում է շաբաթական երկու օր իրենց հաշվին չվճարվող հանգիստ վերցնել, խոսակցություններ էլ կան Մետրոպոլիտենի ուղեվարձի նախատեսվող թանկացման և Մետրոպոլիտենի աշխատակիցների շրջանում սպասվող զանգվածային կրճատումների վերաբերյալ:

Մետրոպոլիտենի ղեկավարությունը դա բացատրում է նրանով, որ պետությունը դադարել է Մետրոպոլիտենին սուբսիդավորել, սակայն աշխատակիցներին այս արդարացումները և պատճառաբանությունները չեն բավարարում, նրանց հատկապես զայրացրել է այն հանգամանքը, որ Մետրոպոլիտենի խորհրդի ղեկավարը Մետրոպոլիտենի վարչական շենքի 7-րդ հարկում շքեղ վերանորոգում է իրականացրել, տնօրենն էլ 5-6 տեղակալ է պահում բարձր աշխատավարձով, սակայն Մետրոպոլիտենի շարքային աշխատակիցներին առանց այն էլ ցածր աշխատավարձի հետ տրվող հավելավճարները այս համատարած թանկացումների համապատկերում 50 տոկոսով կրճատել են՝ բարդացնելով առանց այն էլ բարդ ապրուստը:

Մետրոպոլիտենի աշխատակցի խոսքերով՝ իրենց ասվել է, որ այս ամենը տևելու է ընդամենը 3 ամիս, սակայն դա ոչ մեկին հավատ չի ներշնչում:

Մենք փորձեցինք այս կապակցությամբ պաշտոնական պարզաբանումներ ստանալ Մետրոպոլիտենի լրատվության բաժնից, սակայն «7օր»-ի թղթակցին պատասխանեցին, որ կընդունեն միայն՝ նախապես իմանալով, թե ինչի մասին են զրուցելու։ Երբ մեր լրագրողը ներկայացրեց իրեն հետաքրքրող հարցերի շրջանակը, լրատվության բաժնի աշխատակիցը, զայրացած տեղեկատվության արտահոսքից, հրաժարվեց պարզաբանումներ տալ և պատասխանել «7օր»-ի հարցերին:

7or.am