Սերժ Սարգսյանն այնքան էր մտահոգված Երևանի ավագանու ընտրությունների հետևանքով սեփական աթոռից զրկվելու հեռանկարից, որ Տարոն Մարգարյանի համար բարձր տոկոս «խփեց»` գործում ներգրավելով ոստիկանությանը, պուտանկեքին, բոմժերին ու 5000 դրամանոցներին։ Արդյունքում՝ Տարոնի օգտին «խփած» տոկոսն այնքան բարձր ստացվեց, որ Երևանի քաղաքապետը պաշտոնական տվյալներով ավելի մեծ վարկանիշի տեր դարձավ, քան ՀՀԿ ղեկավարը։

Դժվար չէր կանխատեսել, որ Տարոնին Երևանի քաղաքապետ նշանակելուց հետո Բաղրամյան 26–ը, իր ոճին հավատարիմ, նրան շարունակելու է «փչացնել»։ Այդպես էլ եղավ։

Տրանսպորտի թանկացման բոլոր հարվածները Տարոն Մարգարյանն այժմ գիտակցաբար վերցրել է իր վրա, մինչդեռ անմեղսունակ պետք է լինել՝ չհասկանալու համար, որ երթուղային տաքսիներից ու ավտոբուսներից օգտվելու գները 50 տոկոսով, իսկ տրոլեյբուսների պարագայում՝ 100 տոկոսով բարձրացնելու որոշումը կայացվել է Սերժ Սարգսյանի անմիջական մասնակցությամբ։ Երևանի քաղաքապետարանին ու անձամբ քաղաքապետին վերապահված է «փչանալու» ֆունկցիան։

Փաստորեն, Տարոն Մարգարյանը գիտակցաբար համաձայնել է այդ դերին՝ համակերպվելով այն մտքին, որ քաղաքապետ աշխատելու և «վերևից» եկած հրահանգները կատարելու արանքում մի երկու բան կփախցնի ու ավելի լավ Երևան ..., կներեք՝ ավելի լավ կապրի։

Տարոնի կերպարն այս օրերին ամբողջականացավ նաև այն տեսանկյունից, որ նա էլ իր հերթին փորձում է «պոդստավկա» անել իր խորհրդականին ու քաղաքապետարանի՝ գծատեր վարչության պետին (ըստ ամենայնի՝ շեֆից է սովորել ենթակաների հետևում թաքնվելու տեխնոլոգիան)։ Որքան էլ, սակայն, Մարգարյանը թաքնվի «ճ» կլասի չինովնիկների հետևում, իր «ճ» կլասն այլևս չի կարող թաքցնել։

Նա փալասի դերին համաձայնելով թե՛ Մաշտոցի պուրակի պատմության ժամանակ, թե՛ հիմա՝ ապացուցեց, որ մարդկային արժանապատվությունից զուրկ է։

Տարոն Մարգարյանը նաև ավարտված պաշտոնյա է, քանզի գիտակցելով, որ սպասարկում է Սերժ Սարգսյանի ու նրա ընտանիքի անդամների նեղ շահերը՝ այդպես էլ կամք չդրսևորեց ու չկարողացավ «Չէ» ասել իր նախագահին՝ հաշվի առնելով մարդկանց սոցիալական վիճակը։ Մինչդեռ ՀՀ սահմանադրությամբ և օրենքներով նա ինքնուրույն մարմնի ղեկավար է, և եթե հավատալու լինենք ԿԸՀ–ին՝ վայելում է երևանցիների ավելի քան 50 տոկոսի վստահությունը։ Այսինքն՝ համապատասխան կամքի դեպքում հանգիստ կարող էր «Չէ» ասել։ Կարող էր, բայց չասեց։ Ավելին՝ Տարոնը մի կողմից համաձայնել է թանկացման «ավետիսը» փոխանցել՝ թանկացման պատճառ ներկայացնելով Երևանի աղքատիկ բյուջեն, իսկ մյուս կողմից՝ Երևանի փողոցներում ավտոկայանման գերշահութաբեր բիզնեսը հանձնել է Սերժ Սարգսյանի նեղ շրջապատին։

Եվ այսպես, կյանքը ցույց տվեց, որ Տարոն Մարգարյանը ֆունկցիոնալ առումով չի տարբերվում իր օգտին ձայն ապահոված պուտանկեքից և ընտրակաշառվածներից։ Տարբերությունը գնի մեջ է։ Պուտանկեքին էլ, ընտրակաշառվածներին էլ, Տարոնին էլ Բաղրամյան 26–ն օգտագործում է իշխանության վերարտադրության և անձնական հարստություն դիզելու նպատակով։

Մեկ այլ տարբերություն ևս կա։ Պուտանկեքն ու ընտրակաշառվածները միայն մեկ օր են ծառայում Սերժ Սարգսյանի ռեժիմին, իսկ Տարոն Մարգարյանն ու իր կոլեգաները՝ ամեն օր։

Սևակ Մինասյան