«Ռուսթավի 2» հեռուստաընկերությանը տված հարցազրույցում Ադրբեջան բերման ենթարկված չորս վրացի մարզիկները պատմել են, թե ինչու են ադրբեջանցի սահմանապահները Դավիդ Գարեջայի սահմանակետի մոտ իրենց բերման ենթարկել:

Վրաց մարզիկների հավաստմամբ՝ իրենք այցելել են Ադրբեջանի տարածքում գտնվող Բերթուբանի վանք՝ ուխտագնացության և մոմ վառելու: Նրանց բերման ենթարկած ադրբեջանցի սահմանապահները մարզիկներին պահել են ռազմաբազաներից մեկում՝ պատճառաբանելով, որ նրանք խախտել են սահմանը:

Ըստ վրաց մարզիկների՝ Բերթուբանի վանքը մի քանի տարիների ընթացքում բավականին վնասվել է և այժմ գտնվում է անմխիթար վիճակում:

Վրաստանի արտգործնախարարությունում արդեն ստեղծվել է հանձնաժողով այս դեպքն ուսումնասիրելու համար: Վրաստանի արտգործնախարար Մայա Փանջիկիձեն հայտարարել է, որ իրենք մշտապես խորհրդակցություններ են անցկացնում ադրբեջանական կողմի հետ այդ հարցը կարգավորելու նպատակով: