Ինչպես որ Սերժ Սարգսյանն եկավ Մաշտոցի պուրակ ու ասաց. «Տարոն, գեղեցիկ չի», այդպես էլ քաղաքապետարանի առջևի երեկվա ակցիայից հետո շատերն ասում են «գեղեցիկ չէր»: «Գեղեցիկ»-ն իրավական կատեգորիա չէ, հարգելինե՛րս: Գործողությունների և հարցերի բուն էությունը քննելու փոխարեն մենք գեղագիտական դիտարկումներ ենք անում: Երեկ քաղաքապետը հայտարարել է, որ տրանսպորտի թանկացման որոշման կասեցումն արդյունք էր խոցելի խմբերի ներկայացուցիչների հետ իր հանդիպումների, այլ ոչ թե` հանրության բողոքի ալիքի: Ասել է թե` Տարոն Մարգարյանը «թքած ունի» հանրության վրա: Ավելին` նա հայտարարել է նաև, որ երկու կոռումպացված և հանրությանն անարգող պաշտոնյաների պահանջը երեք-չորս հոգու պահանջ է, և պաշտոնանկության հիմքեր չկան: Սա այն դեպքում, երբ նրանց պաշտոնանկության հիմքերը, այդ թվում` իրավական, բազմիցս ներկայացվել են: Ուրեմն սա ի՞նչ է, եթե ոչ ծաղր բողոքի իրենց ձայնը բարձրացրած այսքան մարդու և լուրջ պահանջներ դրած հանրության նկատմամբ: Երեկվա ակցիան միտում ուներ ակներև դարձնելու քաղաքապետի այս վերաբերմունքը քաղաքի բնակիչների նկատմամբ և համեմված էր մի քիչ ծաղրով կամ հեգնանքով, որպեսզի ցույց տրվեր, որ նման արձագանքի դեպքում հնարավոր չէ շարունակել քաղաքապետի հետ լուրջ խոսել, որովհետև նրա անհիմն հայտարարություններն իրենք իրենցով անլուրջ են: Փաստորեն` մենք ընդունում ենք պաշտոնյաների շարունակական արհամարհանքը և անարգանքը հանրության և օրենքի նկատմամբ և փոխանակ այդ լրջագույն խնդիրը քննելու, հեթական անգամ անցնում ենք ապակառուցողական քննադատության և վիրավորանքների, ինչ է թե խնդիրը վեր հանող ակցիան մեր աչքին անսովոր կամ մեզ ոչ դուրեկան էր:
Ինչ վերաբերում է ոստիկանությանը` առանց իրավական հիմնավորման գույք (վրան) «առգրավելը» ոչ այլ ինչ է, քան հափշտակություն, այսինքն՝ քրեական հանցագործություն: Իսկ սա շատ լուրջ իրավունքի հարց է: Այնպես որ եկեք «գեղեցիկ»-ից անցում կատարենք իրավունքին:

Գայանե Մելքոմ Մելքոմյան–ի ֆեյսբուքյան գրառումը